Meet grondvog vir akkurate besproeiing

Behoorlike besproeiingskedulering kan slegs toegepas word indien die grondvogstatus bekend is en watervermorsing tot die minimum beperk word.

Die meting van grondvog

Verskeie metodes waaronder neutronvogmeters, gipsblokke en kapasitansie kan gebruik word om grondvog te meet.

• Die neutronvogmeter is die akkuraatste metode, maar dit verg baie mannekrag en is tydrowend.
• ’n Goedkoper metode is die gipsblokmetode, maar dit is ongelukkig nie akkuraat genoeg om deur die loop van ’n seisoen konstante grondvoglesings te gee nie.
• Die kapasitansie elektroniese vogmeter kan daarenteen vir ’n hele seisoen in die grond by ’n gewas geplaas word. Dit kan op ’n deurlopende basis die grondvogstatus bepaal en die inligting na ’n rekenaarnetwerk stuur, wat dié data op ’n maklik verstaanbare manier vir die gebruiker kan vertoon.

Vogmeting met kapasitansie

Kapasitansie is die verhouding van die hoeveelheid elektriese lading wat op ’n geleier gestoor word tot ’n verskil in elektriese potensiaal deur middel van ’n diëlektriese medium. In die geval van ’n grondvogmeter word die elektriese lading tussen ’n koperplaat en die grond, wat as die diëlektriese medium gebruik word, bepaal. Die kapasitansie wat ontstaan, word gemeet. Die elektriese lading is hoogs gekorreleer met die vog wat in die grond teenwoordig is en hiervolgens kan die grondvog afgelei word.

Figuur 1 dui aan hoe die elektriese veld gemeet kan word. Die ossillator puls die koper elektrodes, wat ’n ladingsbaan in die grond laat ontstaan. Hierdie ladingsbaan word deur watermolekules in die grond onderbreek, wat die kapasitansie in die elektrode laat wissel. Die wisseling in die kapasitansie dui die hoeveelheid vog aan.

TELEMETRIE

’n Vogmeter doen nie al die werk in die meting van grondvog nie. Die brein van die stelsel is die telemetrie waar die telemetriese eenheid liggingsinligting, krag vir die vogmeter en opsionele reënmeterdata verskaf, en ook die data na die rekenaarnetwerk stuur. Sonder die telemetriese eenheid kan geen data gemeet of gestuur word nie.

PROGRAMMATUUR

Die elektroniese toerusting is nutteloos sonder die programmatuur, wat die sleutel tot die inligting is, aangesien dit die data in ’n maklike verstaanbare grafiek verwerk. Dit dui ook die hoeveelheid aan wat besproei moet word.

NWK se Departement Landboubestuursdienste gebruik die Aquacheck-platform, en verkoop of verhuur die vogmeters en ondersteunende diens aan belangstellende klante. Figuur 2 dui die maklik verstaanbare programmatuur aan.

Samevatting

• Grondvogmeting speel ’n belangrike rol in die sukses van ’n besproeiingsprodusent.
• Oor- en onderbesproeiing kan verhoed word. Dit kan koste beperk en sodoende winsgewendheid verhoog.
• Aquacheck en NWK Landboubestuursdienste kan ’n beproefde en gebruikersvriendelike diens aan besproeiings­produsente lewer.

Bronnelys

• Patil BN, Zope PH and Patil KS, 2015. Development of low-cost TDR system for soil moisture measurement. J. International Journal of Advanced Research in Education Technology. Vol. 2, Issue 3. ISSN: 2394-2975
• Pritchard T, 2003. Using capacitance sensors to monitor soil moisture.
  https://ucanr.edu/sites/CE_San_Joaquin/files/35895.pdf [17 Maart 2022]