’n Hartjie vir die maand van liefde
By VulPro, die aasvoëlbewaringsorganisasie in die Hartbeespoort-omgewing, was die eerste deel van die jaar aan die jaarlikse gesondheidskontroles gewy. Dr Sarah Woodhouse het meer as 200 bloedskyfies ondersoek. Op 14 Februarie het sy egter ’n interessante verskynsel opgemerk – ’n hartvormige sel. Die “limfosietliefde” behoort aan ’n Kaapse aasvoël.
Nie net meer vir uile
- Met die verskeidenheid diere wat deesdae by die Owl Rescue Centre in die Hartbeespoort-omgewing versorg word, sal hulle dalk eersdaags hulle naam moet verander, spot die eienaars, Brendan en Danelle Murray. Een van hul Facebook-volgelinge het vinnig voorgestel dat dit verander word na Owl Rescue Centre and Wildlife Sanctuary. Hier is ’n paar van die nie-uil inwoners.
- Die Sesmyl Voortrekkergroep het kom kers opsteek by Brendan wat glo dat dit van groot waarde is om die jeug vroegtydig te leer van die belangrike rol wat uile speel.
Nommer 93 op reis
VulPro onthaal gereeld Kaapse en Witrugaasvoëls by hul aasvoëlrestaurant. Daar is egter ook ’n aantal ander besoekers wat gereeld inloer – soos die swartaasvoël. Om meer uit te vind oor hoe dié ontwykende spesie deur Suid-Afrika beweeg, is ’n jong mannetjie met ’n GPS-opsporingstoestel toegerus. Op die kaart kan duidelik gesien word hoe hy deur groot dele van Suidelike Afrika reis – Zimbabwe, Botswana en Namibië ingesluit. In Februarie is hy in die Kalahari opgemerk. Wees op die uitkyk vir ’n aasvoël met ’n nommer 93-band om sy been in jou omgewing!
Heeltyd speeltyd
’n Oulike video is op die Care for Wild Rhino Sanctuary se Facebook-blad gedeel van die nege weke oue Tigger wat met sy beskermer, Freddy, probeer speel. Dié klein renoster is reeds vol selfvertroue en terwyl sy ma Timbi rustig wei het Tigger opwinding gaan soek. Freddy het Timbi opgepas sedert sy as
’n klein wesie na die reservaat gebring is.
