DF Malherbe se gedig “Slaap” se inleiding lui: “Wat is die slaap, ’n wondersoete ding!” Ek stem heelhartig hiermee saam. Ek funksioneer nou maar net nie teen optimale kapasiteit sonder ten minste sewe ure in droomland per nag nie. Agt tot selfs nege ure is vir my ideaal.
Ek was van kleins af baie gedissiplineerd hiermee en lief vir roetine. Vroeg in die bed en vroeg op.
Ons leef in ’n veeleisende tyd. Ons is uitgebrand (simptome sluit in oorweldigende uitputting, sinisme en ’n onttrekking aan jou werk) en dra hierdie etiket met trots. Ons dink mos (verkeerdelik) dat ons loopbane “is wie ons is” en nie net iets wat ons doen nie.
Ek werk deur ’n Bybelstudiedagboek, “’n Veilige vesting”, deur die geloofsouteur, Stephan Joubert. Die dagstukkie vir 11 Oktober se opskrif sê: “Slaap is deel van ons geloof.” Die teksvers is Psalm 3:6: “Ek het gaan lê en slaap en weer wakker geword, want die Here het oor my waggehou.”
Stephan sê gesonde slaaproetines behoort deel te vorm van ons geloofsdissiplines. “Dit dien as ’n getuienis teenoor ons familie, teenoor onsself en teenoor God dat ons nie slawe van ons eindelose daaglikse verpligtinge geword het nie.
“Wanneer ons ons werk lank voor slaaptyd eenkant toe skuif en tot rus kom, bevestig ons hierdeur iets van ons vertroue in die Here. Hy het ons gemaak om gereeld te rus. Ons is nie menslike robotte nie.
“Psalm 127 sê in elk geval dat God vir Sy geliefdes gee wat hulle nodig het in hulle slaap. Die Here sluimer nie of slaap nie. Hy sorg vir ons, ook wanneer ons in droomland is. Glo dit en slaap meer en beter.”
Dis crunch time vir julle graanprodusente. Die pitte moet in die grond. Onthou egter om tyd in te ruim om te rus. Om te slááp. Knyp hierdie Desember elke dag ’n tydjie af om terug te kyk na die jaar 2024. Juig oor die hoogtepunte, rou oor die laagtepunte en pen jou ideale en verwagtings vir 2025 neer.
Aan die vroue: Aanvaar jou genooide gaste se aanbod om ’n slaai of poeding vir die Kerstafel te bring. Die geskenkpapier hoef nie alles bymekaar te pas nie en die kinders kan maar een of twee varkie-aande hou wanneer die nefies en niggies oorslaap.
Hou op stres oor detail wat die meeste mense nie eens raaksien of waardeer nie, of in elk geval teen Februarie van sal vergeet.
Geniet ’n geseënde en veilige Christusfees!
