Vida e caffè Lichtenburg het die afgelope Dinsdag sy deure geopen en teen vanoggend 06:00 reeds ‘n indrukwekkende 500 drankies, wat cappuccino’s, latté’s en smoothies insluit, verkoop.
NWK Total Energies Lichtenburg (op die Koster-pad) is nou veral soggens ‘n gewilde bestemming wanneer klante kom stop vir ‘n lekker koppie spesialis-koffie om hulle woema te gee vir die dag wat voorlê. Dit is 24 uur, sewe dae per week, oop.
Daar is ook toebroodjies, muffins, piesangbrood, koek en ander happies waaruit klante kan kies. Die perseel is toegerus met sy eie kombuis waar dit vars gemaak word.
Môre (26 Julie 2025) word die Vida e caffè ook by NWK Retail Randfontein geopen.
Bertus Jacobs, senior bestuurder van NWK Handel, het verduidelik dat NWK deurlopend daarna streef om ‘n beter klante-ervaring te skep. “Vida e caffè se toevoeging tot ons bedryfspunte in Lichtenburg en Randfontein, maak van ons persele ‘n bestemming waar klante wíl stop.
“Ons skep vir klante ‘n beter koop-ervaring terwyl ons waarde toevoeg tot die verskillende dorpe. Met die toevoeging van Vida e caffè, slaag ons in ons doel om die gemeenskappe waarbinne ons sake doen, op te hef.”
Personeel is ‘n maand lank aan ‘n intensiewe opleidingsprogram onderwerp om toe te sien dat kwaliteitprodukte deurlopend op ‘n vasgestelde standaard voorgesit word.
Die moontlikheid om nóg Vida e caffè’s by NWK-bedryfspunte te open, word nie uitgesluit nie. “Ons wil graag ‘n pad saam met Vida e caffè stap en daar waar dit sin maak om waarde toe te voeg, ‘n beter koop-ervaring te skep en gemeenskappe op te hef.”
