In vandag se digitale wêreld van slimfone, rekenaars, kunsmatige intelligensie (oftewel AI) en ander moderne hulpmiddels, hou NWK Online die pas vol met nuwe toevoegings en innoverende funksionaliteite wat deurlopend volgens gebruikers se groeiende behoeftes ontwikkel word.
Hierdie artikel bevat vuurwarm inligting oor drie nuwe funksies wat onlangs hulle buiging op Online gemaak het. Meer inligting word ook verskaf oor die nuutste weergawe van die Kuddebestuursprogram. Gepraat van ’n buiging maak…ontmoet gerus vir Klick; ’n parmantige karaktertjie wat oorgehaal is om jou ervaring van Online te vergemaklik.
Aangename kennis, Klick!
Hallo, daar! My naam is Klick, en NWK Online is my spesialiteit. Kyk uit, want ek gaan binnekort op jou skerm wees om gebruikers makliker deur dié slimkoptoep vir landbou te lei en wenke te gee oor hoe om ’n bedrewe Onliner te wees.
Online spog met drie nuwe funksies
NWK-KAART – IN JOU BEURSIE EN NOU OOK OP JOU FOON
Alweer nie jou NWK-kaart by jou nie? Geen probleem nie! Jy kan nou jou NWK-kaart by NWK Retail-winkels of -vulstasies gebruik sonder om dit fisies te toon.
Doen dit in sewe stappe
- Teken in by online.nwk.co.za
- Gaan na REKENINGBESTUUR
- Kies TOEGANGSBEHEER
- Kliek op DEBIET/PINKODES
- Kliek op VERANDER PINKODE
- Voeg identifikasie van kaarthouer in by NAAM
Kies vier numeriese karakters en sleutel pin in by PINKODE
(Hou dit veilig en moet dit met niemand deel nie) - Kliek op STOOR
NWK Retail-betaalpunt
Besoek bloot een van ons NWK Retail-winkels of -vulstasies en verskaf jou rekeningnommer met betaling, waarna jy versoek sal word om die pin op die kaartmasjien in te sleutel.
MONITOR JOU BRANDSTOFAANKOPE PER VOERTUIG
Rekordhouding van brandstoftransaksies is nou op NWK Online beskikbaar. Gaan na online.nwk.co.za om jou brandstofstatistieke te bekom.
Doen dit in vier stappe
- Gooi brandstof in by enige NWK-vulstasie
- Die brandstofjoggie sal jou NWK-rekeningkaart skandeer
- Hy/sy vra dan toestemming om die voertuig se lisensieskyf te skandeer
- Nadat die skandering voltooi is, word die betrokke voertuiginligting aan jou NWK-rekening gekoppel
GEDETAILLEERDE MEGANISASIE-WERKKAARTE
Besoek online.nwk.co.za om gedetailleerde meganisasie-werkkaarte te sien, soos wat dit nie noodwendig op fakture voorkom nie.
Doen dit in drie stappe
-
- Gaan na REKENINGBESTUUR
- Kies WERKKAARTE
- Selekteer die gedetailleerde meganisasie-werkkaart wat jy kan sien, of aflaai en uitdruk
Veekundige gesels oor Kuddebestuur
NWK Online se Kuddebestuursprogram is ’n opwindende funksie wat onder die Plaasbestuurkategorie te vinde is. Die ontwikkelingspan het onlangs bykomende werk daarop voltooi, wat gebruikers in staat stel om kuddedata aanlyn én selfs aflyn in te voer. Die program staan behoorlik sy man in die mark – en kan selfs ander soortgelyke programme die stryd aansê.
Aangesien NWK kragte saamgesnoer het met Tal-Tec, ’n verskaffer van elektroniese skale en veehanteringstoerusting, bied die program nou ’n funksie om diere wat ’n elektroniese oorplaatjie dra, te skandeer – wat die tel en weeg van diere maklik maak, aangesien die oorplaatjie met die skaal en die toep kommunikeer.
Let wel dat gebruikers die NWK Livestock App benodig om hierdie funksie te gebruik. Maak dus seker om die NWK Livestock App gratis van jou voorkeur aanlynwinkel af te laai om dié opwindende funksie aflyn te kan gebruik. Die skaal se data kan dan met jou Kuddebestuur-profiel sinkroniseer wanneer jy weer aanlyn is.
DAWID SÊ SY SÊ
NWK Arena het gaan kers opsteek by Dawid van Heerden, veekundige by NWK Finansiering, oor sy indrukke van die program.
Hoe ervaar jy NWK Online se Kuddebestuursprogram?
Ek is ’n veekundige, maar boer ook deeltyds met vee. Hoewel ek voorheen ’n ander toep vir kuddebestuur gebruik het, verkies ek NWK Online se Kuddebestuursprogram, in kombinasie met die gratis NWK Livestock App. Die terugvoer van ons NWK-klante wat dit gereeld gebruik, is ook baie positief.
Watter funksies staan vir jou uit?
Die program is maklik om te verstaan en te gebruik – en dit is boonop kosteloos vir geregistreerde gebruikers van Online. Dit is baie handig dat jy dit kan gebruik en die data stoor wanneer jy nie aanlyn is nie (of buite bereik van ’n selfoonsein). Sodra jy weer aanlyn is, sinkroniseer dié data met die stelsel, wat dit eenvoudig maak om op te dateer. Die gebruiker kan ook ’n derde party, soos ’n plaasvoorman, toegang tot die program gee.
Is daar ander soortgelyke toeps beskikbaar?
Daar is, maar vir ’n wegspring is die gebruik daarvan nie, soos met NWK Online, gratis nie. My ervaring is ook dat dit minder gebruikersvriendelik as ons Kuddebestuursprogram en NWK Livestock App is.
’n Hooffokus van die program is rekordhouding. Na watter rekords word hier verwys?
Die Kuddebestuursprogram bied ’n handige manier om rekord te hou van die medisyneverbruik per dier, naspeurbaarheid, genetika, rekordhouding elke keer as die dier geweeg word en die opstel van weegverslae – wat deur SA Stamboek erken word.
Watter produsente kan hieruit voordeel trek?
Voerkraalboere kan dit vir die gewigsevaluasie van hul diere gebruik, stoetbeesboere vir genetika en saaiboere vir inligting oor ’n kudde of vir die aantekening van kalfpersentasie per koei. Die ander algemene funksies wat beskikbaar is, maak die pakkie vol om vir jou ’n eenstop kuddebestuurshulp op jou lessenaar en in jou hand te gee.
