NWK is weer as ’n topwerkgewer aangewys en is een van slegs 155 organisasies in Suid-Afrika wat met dié eksklusiewe status kan spog.
Die maatskappy se bestuur het die toekenning op 19 Februarie by ’n glansgeleentheid in Johannesburg in ontvangs geneem. “Hierdie erkenning deur die internasionale Top Employers Institute is ’n bewys van ons voortgesette toewyding om ’n werksomgewing van wêreldgehalte te skep,” het Dennis Coetzee, uitvoerende groepbestuurder van Mensekapitaal by NWK, gesê.
“Ons glo by NWK dat ons mense ons grootste bate is, en hierdie sertifisering bevestig ons fokus op uitnemende menslike hulpbronpraktyke, werknemerswelstand en professionele groei. Baie geluk aan elke werknemer wat tot ons kultuur van uitnemendheid bydra. Saam bou ons nie net aan die toekoms van landbou nie, maar ook aan ’n werksplek waar talent floreer.”
Die Top Employers Institute is werksaam in 131 lande en sertifiseer organisasies volgens die resultate wat hulle behaal in ’n peiling wat die instituut onderneem om die werksplek se mensestrategie, werksomgewing, talentwerwing, leer, diversiteit, gelykheid en inklusiwiteit, asook welstand, te ontleed.
Die instituut se uitvoerende hoof, Adrian Seligman, het gesê dat NWK se status as topwerkgewer sy toewyding tot ’n uitnemende werksplek, wat volhoubare besigheidsprestasie moontlik maak, weerspieël.
“Hulle sterk belyning tussen mensestrategie en organisatoriese doelwitte, gekombineer met ’n verbintenis tot voortdurende verbetering, demonstreer die impak van hul transformerende praktyke. Ons is trots daarop om NWK vir hulle betekenisvolle bydrae tot ’n beter werksplek in Suid-Afrika te erken.”
