Helde in natuurbewaring
In hierdie uitgawe wil ons graag ’n pluimpie gee aan verskeie instansies wat ure en energie spandeer om die natuurlewe te bewaar. Hulle passie en toewyding verdien erkenning. Besoek gerus die organisasies se Facebook-bladsye om te sien wat hulle so besig hou en waar en hoe jy betrokke kan raak.
Die Owl Rescue Centre in die Hartbeespoort-omgewing is toegewy aan die beskerming van uile, maar sê nooit nee as ’n ander geveerde of vierpotige in nood is nie.
VulPro, die nie-winsgewende aasvoëlbewaringsorganisasie in die Hartbeespoort-omgewing, streef daarna om ’n aasvoëlbewaringsprogram te hê wat bewustheid oor aasvoëls bevorder.
Nog ’n organisasie wat erkenning vir hul aandeel in natuurbewaring verdien, is die South African Wildlife Rehabilitation Centre (SAWRC). Hierdie rehabilitasiesentrum is gestig om na wees, siek en beseerde wild, wat selfs verkleurmannetjies insluit, om te sien.
Care for Wild Rhino Sanctuary is die wêreld se grootste weesrenoster-reservaat, wat spesialiseer in die redding, rehabilitasie en hervestiging in hul natuurlike habitat asook deurlopende beskerming van hierdie spesie.
Gelukkige eindes
’n Bobbejaan wat op die Lanseria-pad raakgery is, is in Oktober deur die Owl Rescue Centre gerehabiliteer. Die eienaars, Brendan en Danelle Murray, en ’n span weldoeners het verseker dat Mr Beans, soos hy gedoop is, vinnig gerehabiliteer is sodat hy weer by sy trop kon aansluit. Kliek op die skakel en kyk na hierdie suksesverhaal.
Care for Wild Rhino Sanctuary het vroeg in Oktober ’n drie weke oue renosterkalfie in ’n kritieke toestand opgeneem nadat hy deur hiënas aangeval en ernstig gewond is. Die kalfie was teen druktyd steeds in die intensiewe sorgeenheid, waar die span 24 uur per dag sorg verskaf om hom te stabiliseer en sy beserings te behandel. Alhoewel daar ’n lang herstelpad voorlê, is die goeie nuus dat hy tans goed drink en ’n gesonde eetlus ontwikkel het.
