Tegnologie is die toekoms van landbou. Dit kan produsente se dagtake vergemaklik en rekordhouding verbeter. Tegnologie verander bykans daagliks, so daarom is dit goed om op hoogte van al die nuutste ontwikkelinge te bly.
Doen dit self
Elke boerdery sal eendag die spreekwoordelike “Tom, Dick en Harry” hê, wat die dagtake nie net op eie inisiatief sal voltooi nie, maar ook op ’n meer omgewingsvriendelike manier gaan uitvoer. Dit klink verregaande, maar die tegnologie om hierdie aksies uit te voer bestaan reeds.
- Tom is ’n robot wat primêr die lande karteer en elke plant en onkruid op ’n kunsmatige intelligensiekaart stoor. Uit hierdie inligting kan oesskattings en ander boerderybeplanning maklik gedoen word.
- Dick is ’n robot wat deur die lande beweeg en elke onkruid individueel met ’n elektriese stroom doodmaak. Dit is nie net heelwat meer omgewingsvriendelik as onkruiddoder nie, maar kan boerderye ook help om hulle organiese status makliker te bereik. Sien Foto 1 (Bron: www.agriland.ie).
- Harry is ’n robot wat al die harde werk doen, soos plant, bemesting toedien en stroop. Met die hulp van die kaarte wat Tom genereer, kan mikrodosering per plant gedoen word, wat sal verseker dat elke plant op die plaas optimaal groei.
Groen trekkers
In hierdie konteks dui “groen” nie die trekkervervaardiger se kleurkeuse aan nie, maar dat die motor deur meer omgewingsvriendelike metodes aangedryf word. Elektries aangedrewe trekkers en gifspuite is ’n alternatief vir die gebruik van diesel as brandstof. Behalwe vir die feit dat minder CO2 geproduseer word, is die klankbesoedeling ook aansienlik minder.
Die multi-tool trac (Foto 2) is ’n trekker wat 100% elektries aangedrewe is en pasgemaak ekstra lank is. Dit kan implemente voor, in die middel en agter die trekker sleep om drie aksies gelyktydig uit te voer. Die wielwydte is ook elektries verstelbaar – tussen 2,25 m vir padgebruik en 3,25 m vir permanente spoorverkeerstelsels.
Bron: https://start-life.nl
Arduino edge control
Die arduino edge control-moederbord (Foto 3) sluit die wêreld van slimboerdery, presisieboerdery en ander intelligensiestelsels oop deur alles op een geïntegreerde bord te huisves. Dié bord is met Bluetooth toegerus en sy vermoëns kan met die ander Arduino MKR-borde na 2G-, G-, CatM1- en NB-IoT-modems, LoRa®, Sigfox en Wi-Fi uitgebrei word.
Bron: https://blog.arduino.cc
Aangesien die bord ook oor sonkragvermoëns beskik, is dit uiters geskik vir die landbou-omgewing. Verskeie sensors kan aan die bord gekoppel word om byvoorbeeld gewasinligting en toerusting se doeltreffendheid te monitor en inligting oor weerstoestande in te samel.
Bronnelys
Arduino Team, 2021. Sense the future of smart agriculture with Arduino Edge Control. https://blog.arduino.cc/2021/04/22/sense-the-future-of-smart-agriculture-with-arduino-edge-control/ [1 Julie 2021]
De Ruiter F, 2016. About ideals and dabbling in the mud. https://start-life.nl/ideals-dabbling-mud-founder-story-multi-tool-trac/ [1 Julie 2021]
Roberts J, 2021. ‘Per plant farming’ with Tom, Dick and Harry. https://www.agriland.ie/farming-news/per-plant-farming-with-tom-dick-and-harry/ [1 Julie 2021]
