Wenners aangewys

Die broers Christo en Johan van Niekerk van VNB Boerdery is as die algehele wenners aangekondig. Hulle plant droëland mielies, soja en sonneblom asook mielies, koring en sojabone onder besproeiing aan. Die boerdery het ook ‘n veekomponent, wat uit vleis- en melkbeeste asook skape bestaan.

Michael van Rooyen, bestuurder van Adviesdienste by NWK se Landboubestuursdienste en ook studieleier, het verduidelik dat nie net die totale hektare geproduseer en veevertakkings vir hierdie toekenning oorweeg word nie, maar ook die boerdery se totale inkomste, uitgawes en balansstaatinligting.

Attie Smook, wat droëland mielies, sonneblom en sojabone aanplant, boer ook met vleisbeeste en skape. Hy is as die graanwenner aangewys. “Al die graangewasse wat elke deelneende boer gedurende die produksiejaar aangeplant het, word per boerdery-eenheid in berekening gebring. Dit behels die graanvoorraad op hande, totale inkomste en direkte uitgawes,” het Michael gesê.

Magnus en René Theunissen is as die veewenners aangewys, deurdat die vleisbeesvertakking se totale inkomste, minus direkte uitgawes en groei in batewaarde, tot die beste randwaarde per produserende dier gelei het. Hulle plant ook mielies en sonneblom op droëlande aan.

Riaan en Andriëtte Brand wat boer met droëland mielies, sonneblom, grondbone en sojabone asook met vleisbeeste, skape en varke, se rekordhouding en administrasie tydens die data-opname was die beste en hulle was daarom die administratiewe wenners.

Dirk Laas van Laas en Seun Landgoed BK het die beste vordering getoon, deurdat hy finansieel die beste van die vorige na die huidige jaar gegroei het. Sy boerdery behels droëland mielies en sonneblom, en daarmee saam is daar ook vleisbees- en skaapvoerkraal vertakkings.

“Die studiegroep bied aan lede ‘n platform om bymekaar te leer. Almal is bereid om hulle suksesse en foute te deel. Die enigste subjektiewe beoordeling, is dié van die administratiewe wenner. Al die ander kategoriewenners word bepaal deur die deelnemers se finansiële data in ‘n model in te lees en só die onderskeie wenners te bepaal,” het Michael afgesluit.

Hoe die studiegroep werk

• Die finansiële ontleding word vir ‘n spesifieke produksiejaar (September tot Augustus) gedoen, byvoorbeeld 1 September 2020 tot 31 Augustus 2021.
• Elke deelnemer ontvang vooraf ‘n vraelys oor algemene plaasinligting, soos plaasgrootte, hektaaropdeling, reënval, boerderyvertakkings, opbrengste per hektaar, prys per ton vir gewasse ontvang, begin- en eindvoorraad van graan, veegetalle, speenpersentasies, arbeidgetalle, totale liter diesel vir boerdery gebruik, asook gedetailleerde finansiële inligting soos uitgawes per vertakking, vastekoste, en alle ander uitgawes. Hierdie inligting word dan tydens ‘n plaasbesoek ingesamel en later op kantoor verwerk.
• Uit hierdie inligting word ‘n gedetailleerde balansstaat met verhoudingsgetalle, ‘n inkomstestaat en vertakkingsontledings opgestel.
• Elke vertakking word in detail tot op R/ha en R/ton vlak ontleed, asook die vee – tot op R/GVE en R/dier vlak.
• Nadat elke deelnemer se inligting verwerk is, word die studiegroep se inligting verwerk.
• Die inligting word dan gebruik om die lesing vir die finansiële afsluiting voor te berei.
• Tydens die aand van die afsluiting kry elke deelnemer sy persoonlike resultate, wat dan met die groep se resultate vergelyk kan word.
• In die lesing word die groep se gemiddelde syfers bespreek en met vorige jare vergelyk, maar by die vertakkings word die deelnemers se inligting teenoor mekaar gemeet. Hier kan elke boer sy opbrengs, inkomste en uitgawes vir elke vertakking met medeboere vergelyk.