Neem ’n uil aan
Een van die maniere waarop die Owl Rescue Centre in Hartbeespoort probeer om hul fondse aan te vul, is deur uile vir aanneming beskikbaar te stel. Die aannemingsfooi is R600 en die geld word gebruik vir die reddings- en rehabilitasiekoste. Alle aangenome pasiënte bly egter by die sentrum gedurende hul rehabilitasieproses totdat hulle weer in die natuur vrygelaat kan word. Stuur gerus ’n e-pos aan info@owlrescuecentre.org.za of besoek hul Facebook-blad vir meer inligting.
Komaan, vervoer ’n geveerde beseerde
Vrywilligers van die Owl Rescue Centre se koeriergroep geniet dit om deel te wees van dié reddingspan. ’n Vrywilliger word een of twee keer per maand ingespan om ’n “pasiënt” iewers te gaan oplaai en na hul naaste diere-rehabilitasiesentrum of veearts te neem – of selfs na die Owl Rescue Centre.
Ongeluksvoël binnekort weer op vrye voet
In Februarie het vrywilligers gehelp om ’n jong witrugaasvoël van Kuruman in die Noord-Kaap na VulPro, die aasvoëlbewaringsorganisasie in die Hartbeespoort-omgewing, te vervoer – ’n 15-uur lange rit. Dié pasiënt is deur ’n vragmotor raakgery en ’n ooggetuie het die voël gered. Hy is na ’n plek in Kathu geneem, waar hy vir ’n paar dae tuisgegaan het tot daar ’n geleentheid na VulPro gereël kon word. Volgens VulPro behoort die jong aasvoël vinnig te herstel. Hy kort net ’n bietjie liefde en die regte voeding voordat hy weer sy vlerke kan sprei.
Kupido tref raak by VulPro
In die vorige uitgawe het ons berig oor die Afrika-aasvoëls wat uit Amerika na VulPro, die aasvoëlbewaringsorganisasie in die Hartbeespoort-omgewing, verhuis het. Die swartaasvoël, Kassie, het in Februarie besluit om vlerk te sleep by een van die jong mannetjies by VulPro. Dié toekomstige broeipaar gaan eersdaags na hul eie teelhok geskuif word.
