NWK het Vrydag (25 November) werknemers met 25 jaar en langer diens by die maatskappy tydens ‘n spesiale toekenningsgeleentheid vereer. Pieter Kleingeld, groephoof- finansiële beampte van NWK, het hulle sertifikate aan hulle oorhandig. Theo Rabe, groephoof- uitvoerende beampte van die maatskappy, was ook daar om hulle geluk te wens.
Thabo Mosweu van NWK Meganisasie Koster is reeds 35 jaar lank in diens van NWK.
Twaalf ander werknemers is vir 25 jaar se diens erken. Hulle is Jolene du Toit (Finansiering), William Tshongoye (NWK Meganisasie Lichtenburg), Abram Kerebotswe (NWK Retail Koster), Francois Human (Retail), Ishmael Baloyi (Bodenstein silo), Moltar Machava (Bodenstein silo), Lappies Labuschagne (Ingenieursdienste), Gert Dintwe (Halfpad silo), Paul Mofojane (Nooitgedacht silo), Joel Motshwanaesi (Swartruggens silo), Jan Pule (Syferbult silo) en Jacques van Wyk (Silodienste).
Dennis Coetzee, groepbestuurder van Mensekapitaal by NWK, het hulle toegespreek. Hy het teruggedink aan toe hy 20 jaar gelede by NWK aangesluit het.
“Ek sou sertifikate van 10, 15 en 30 jaar diens in kollegas se kantore sien en dit eintlik intimiderend vind. Ek het gewonder hoekom hulle so lank by dieselfde plek werk, veral aangesien een van my dosente ons aangeraai het om elke drie jaar van werkgewer te verander. Vandag dink ek egter anders hieroor en het myself afgevra watter voordele lang diens vir ‘n maatskappy soos NWK inhou.”
Hy het verduidelik dat hierdie werknemers ‘n sterk grondslag van kennis het. “Hulle weet baie van die maatskappy se kultuur, produkte en dienste. Hulle het verskeie veranderinge binne die organisasie ervaar en verstaan wat werk en wat nié. Hierdie sterk fundamentele kennis het hoër produktiwiteit tot gevolg en lei tot minder foute.”
Dennis meen ook lang diens lei tot stabiliteit. “Dit skep ‘n betroubare werksomgewing en verbeter moraal en empatie binne ‘n span. In ekonomieë waar werksgeleenthede beperk is, is langtermyn werknemers tekenend van ‘n veilige werksomgewing.”
Werkers met jarelange diens bied ook ‘n ondersteuningstelsel van onskatbare waarde. “’n Nuwe werknemer moet opgelei word. Langtermyn werknemers is reeds deur hierdie proses en kan waardevolle ondersteuning aan hul nuwe kollegas bied. Dit is waarom goeie langtermyn werknemervoordele belangrik is om die omsetkoers van werkers te verminder.”
Werknemers wat reeds lank in ‘n maatskappy se diens is, het ook gevestigde, sterk en goeie klanteverhoudinge. “Hulle het reeds oor die jare ‘n verhouding met klante ontwikkel. Laasgenoemde het dus oor die jare op hierdie werknemers begin staatmaak om produkte en dienste te lewer.”
