Maak rekordhouding maklik met NWK Online

Die nuwe bygewerkte NWK Online is amptelik op 21 Junie 2023 bekendgestel en spog met opwindende nuwe funksionaliteite waarsonder die moderne produsent eenvoudig nie kan klaarkom nie. Alhoewel hierdie toepassing reeds beskikbaar is vir produsente, word daar deurlopend verbeterings aangebring. Op hierdie wyse word die toepassing oor tyd uitgebrei, verbeter en opgedateer.

NWK Online plaasbestuur

NWK Online spog met ‘n unieke platform – spesiaal vir die produsent geskep – waar alle landbouverwante data deur NWK behartig, met een kliek tot die produsent se beskikking is. Die produsent loop dus nou met alle historiese en intydse presisiedata van sy/haar boerdery in die hand.

Kitsinligting oor al jou landboukundige verwante data op jou vingerpunte sluit in:

• Detailbegroting.
• Reënvaldata.
• Kuddebestuur.
• Fisiese grondkarteringskaarte.
• Grond- en gewaspotensiaalkaarte.
• Chemiese presisiekaarte.
• NDVI-beelde.
• Stroperkaarte.
• Alle landboukundige verslae.

Gewasbeplanning – detail begroting

Boerderybegrotings gee produsente ‘n idee van die winsgewendheid van ‘n boerdery se produksie in die jaar wat kom. Die resultate van die begroting kan dan gebruik word om bestuursbesluite te neem en om doelwitte vir die komende jaar te stel. ‘n Begroting is ‘n vooruitbeplanning en dus sal ‘n produsent dit op grond van aannames, vorige jare se prysvlakke, prysstygings, vooruitskattings sowel as persoonlike ervaring moet opstel.

Met die nuwe toevoeging tot NWK Online kan die produsent sy nodige begroting en beplanning vir die komende groeiseisoen vooraf op die platform inlees en stoor, asook veranderings maak soos nodig om so ‘n akkuraat moontlike saamgestelde verslag aan die einde van die seisoen te bekom. Die opsommingsverslag (ook in Excel-formaat beskikbaar) gee die produsent ‘n goeie berekende beraming van die totale produksiekoste (R/ha), verwagte inkomste, wins/verlies (R/ha), asook gelykbreekprys en -opbrengs volgens sy begroting vir die seisoen wat voorlê. In dié geval word die gedetaileerde begroting ook gebruik om die produsent se produksielening-aansoek by NWK Finansiering te vergemaklik en bespoedig.

Alle lande – met elkeen se unieke landnommer – is reeds aan die produsent se lidnommer gekoppel. Die produsent het die opsie om elke individuele land aan ‘n spesifieke gewas, beplande opbrengs, sakprys en plantdatum te koppel.

Die detail begroting (onder Plaasbestuur, gewasbeplanning) maak voorsiening vir saad, bemesting, bewerking, onkruid en plaagbeheer, arbeid, asook diverse, tesame met die jongste neigings wat jaarliks deur NWK se landbou-ekonome opgedateer word.

Indien jou lande nie aan jou lidnommer op die NWK Online-toep gekoppel is nie, kontak gerus vir Unita Breytenbach by 018 633 1151.

Reёnvaldata

Dit is vir NWK uiters belangrik dat noukeurige rekords van reënval in NWK se bedieningsgebied gehou word om produsente te help om deurslaggewende besluite te neem. Daarom het NWK dit goedgedink om elke klant die geleentheid te bied om sy eie reënvalrekords op NWK Online te stoor. Die reënval kan deur die produsent volgens sy lande/plase ingelees en gestoor word om só langtermyn reënvaldata van sy boerdery te bou.

NWK hou ook van die reënval gedurende die jaar by alle NWK-silo’s rekord. ‘n Kumulatiewe reënvalkaart (Figuur 2), volgens dié data vir ‘n spesifieke tydperk, kan dus deur die klant op NWK Online (Plaasbestuur, land- en reënvalinligting) verkry word. Dit gee die produsent die geleentheid om die reënval in sy streek met dié van ander NWK-areas te vergelyk. Uiteindelik kan daar nie veel aan die reënval gedoen word nie, behalwe dat dit so goed moontlik bestuur word, gegrond op betroubare langtermynrekords.

Kuddebestuur

‘n Toenemende aantal NWK-produsente diversifiseer hulle saaibedryf met ‘n veevertakking om sodoende hulle risiko in die boerdery te versprei. Kuddebestuur op NWK Online se funksionaliteite sluit die volgende in:

• ‘n Databasis vir al die vee (beeste, skape, varke en bokke) op die plaas.
• Rekordhouding van bestuursinligting soos gewig en dieregesondheid.
• Toeken van diere aan troppe wat in groepsverband behandel kan word.
• Rekordhouding van alle behandelings soos inentings en dragtigheidsondersoeke.
• Rekordhouding van alle wegings en monitering van groei van elke dier.
• Rekordhouding van vrektes of verkoop van diere kan teen datum, asook oorsaak van vrektes (siekte, diefstal, slagtings) aangeteken word.
• Rekordhouding van troppe en hoeveelheid diere wat per kamp loop oor tyd, vergemaklik dus kampbestuur.

Data kan aflyn ingelees word in die veld, waarna dit sal sinchroniseer met die hoofdatabasis sodra dit binne ‘n internetverbinding gebring word. Daarom is dit belangrik dat gebruikers die NWK Livestock-toep aflaai. Dit is gratis op beide die “Android” en “Apple”-platforms beskikbaar.

Landinligting

Gronddetailopnames wat deur Agtech@NWK se grondkundiges uitgevoer is, word elektronies op NWK se nuwe toep in die veld aangeteken. Die data word vasgevang en ‘n is onmiddellik outomaties op NWK Online beskikbaar (Figuur 4). Die grondlyne word met behulp van ‘n ArcView-sagtewarepakket op ‘n GPS-kaart van die plaas gedigiteer.

‘n Omvattende verslag, vergesel deur ‘n GIS-gegenereerde grondkaart en gewaspotensiaalkaarte (Figuur 5) van die plaas, is die finale produk. Die grond word eenmalig gekarteer en word gebruik om variënde plantestand, bemestingskaarte, ensovoorts te genereer en só hande te vat met die produsent se presisieboerderypraktyke.

Chemiese presisie ontledingsdata word ingevoer deur NWK se nuut gegenereerde GIS-rekenaarprogram en word binne sekondes verwerk om chemiese kaarte van die land vir elkeen van die ontledingsparameters (pH en makro-elemente) te genereer en vir die produsent aanlyn beskikbaar te stel. Differensiële regstellings word dan vir die toepaslike bemestingstowwe voorgestel deur die produsent se NWK-landboukundige.

Historiese chemiese data van die produsent se lande kan met die huidige grondstatus ná regstellings vergelyk word (Figuur 6). Dit vergemaklik die produsent se vertroue in sy NWK-landboukundige se aanbevelings en is ook net een kliek ver van alle data rakende jou presisieboerdery.

NDVI-beelde, op vyf dae intervalle, is ook op die NWK Online-toep beskikbaar (Figuur 7). Dié beelde kan regdeur die groeiseisoen deur die produsent se landboukundige asook die boer self gekontroleer word. Dit vergemaklik die proses om probleemareas (as gevolg van bewerkingspraktyke, opkomsprobleme, swak grond of panne in die land en spuitskade) vroegtydig te identifiseer en aan te spreek.

Stroperdata is die nuutste toevoeging tot die NWK Online-toep waarmee NWK deesdae spog. Stroperdata kan ook nou deur die produsent self op die toep gelaai word, waar stroperkaarte (Figuur 8) outomaties gegenereer en aanlyn beskikbaar gestel word. Alle historiese stroperdata word op dié manier op die produsent se NWK Online-profiel gestoor en sodoende kan die produsent rekord hou van sy opbrengste deur die jare .

Samevatting

Die gratis NWK Online-platform is ‘n eenvoudige, handige stuk gereedskap wat alle data oor jou presisieboerderypraktyke op een plek kan saamvat en só kommersiële produsente se lewens vergemaklik.

Vir verdere navrae kontak die outeur by 072 324 2253 of rachel@nwk.co.za.