Beoordelaars is steeds beïndruk met die kwaliteit van diere wat in vanjaar se NWK Retail Slaglamskou meegeding het, al was daar heelwat minder inskrywings weens die afgelope droogte en hoë pryse van veevoer.
Hierdie jaar het die Ile de France-ras koning gekraai by die skou en Gert van der Linde van die Mareetsane-omgewing is tydens die aan hak beoordeling as beide die enkel- en groepkampioen gekroon.
Waar daar verlede jaar ‘n rekordgetal inskrywings (178) was, het deelnemende produsente vanjaar slegs 92 lammers ingeskryf.
“Hoewel daar minder lammers ingeskryf is, was daar nie een A1-gradering waar die dier op grond van ‘n té hoë of té lae gewig uitgeval het nie,” het Hennie Gerber, ‘n beoordelaar van South African Meat Industry Company (Samic), by die prysuitdeling gesê.
Hy het, in samewerking met Albertus du Toit van Samic, die aan hak beoordeling by Stella Vleis Abattoir behartig.
uitvoerende beampte van NWK.
“Die gemiddeld was A2 en A3. Die vetgehalte deur die bank was besonders goed hierdie jaar. Die uitskot was minder, so die gemiddeld van die skou is goed. Die abattoir behoort hierdie groep lammers baie maklik te kan bemark,” het Hennie bygevoeg.
Waar die toplam verlede jaar met ‘n ongelooflike punt van 99,49% gespog het, het die eerste plek vanjaar ‘n punt van 92,13% behaal. “Die punt is nie vanjaar so hoog nie, hoofsaaklik weens die bouvorm. Diegene met ‘n vol bouvorm was almal te swaar,” aldus Hennie.
Gert het 16 lammers ingeskryf en is die kampioen en reserwekampioen in beide die enkel en groep aan hak beoordelings. Hy is in 2021 as SA Stamboek se kleinvee-streekwenner in Noordwes aangewys en het dubbele goue status verwerf.
“Dis altyd lekker om jou karkasse met dié van ander deelnemers te kan vergelyk en te sien waarvoor beoordelaars kyk. Die vleiseienskappe wat hulle verkies, bepaal tog jou teeldoelwitte en die rigting wat jy moet inslaan. Dit bied ook die geleentheid om leemtes te identifiseer en te verbeter,” het Gert gesê.
“Die gemeenskaplikheid wat ‘n skou soos dié van NWK Retail bied om skaapboere met ‘n passie bymekaar te bring, is altyd lekker. Jou prestasie by ‘n slaglamskou soos hierdie bied ook goeie bemarkingswaarde en ons sê dankie vir NWK wat hierdie platform bied.”
Gert het bygevoeg dat, omdat ‘n Ile de France-lam só vinnig groei en daar ‘n beperking op die maksimum gewig is wat ‘n deelnemende lam mag uitslag, dit nogal uitdagend is om die dier skougereed te kry.
“Gewoonlik bemark ons die lammers eers op 28 kg tot 30 kg, maar dan word hulle reeds in die kompetisie gepenaliseer. Jou poel waaruit jy kan kies wat aan die maatstawwe voldoen sonder om gepenaliseer te word, is dus kleiner.”
Sy lammers ontvang van kleins af kruipvoeding en word op twee maande gespeen wanneer hulle ongeveer 25 kg weeg. Hierna gaan hulle na die voerkraal waar hulle lusern, mieliemeel en ‘n konsentraat ontvang.
Die op hoef beoordeling is Dinsdag by Ottosdal se Skougronde gehou en deur Paul Maree, ‘n onafhanklike beoordelaar, hanteer. Die prysuitdeling is Donderdag by Stella Doringkraal gehou.
Uitslae
ENKEL AAN HAK
- Gert van der Linde
- Gert van der Linde
- Boytjie Crispin
- Gert van der Linde
- Boytjie Crispin
GROEP AAN HAK
- Gert van der Linde
- Gert van der Linde
- Willem Vosloo
- Wikus Bouwer
- Jannes Schickerling
ENKEL OP HOEF
- Boytjie Crispin
- Boytjie Crispin
- Boytjie Crispin
- Boytjie Crispin
- Boytjie Crispin
NWK Retail se Slaglamskou.
GROEP OP HOEF
- Boytjie Crispin
- Boytjie Crispin
- Boytjie Crispin
- Gert van der Linde
- Boytjie Crispin
Daar is ook erkenning gegee aan superlammers wat ingeskryf is. GJ du Plessis van Wilgestroom Boerdery naby Potchefstroom is as die kampioen gekroon en is ook derde. Gert is die reserwekampioen.
