Optimale daaglikse groeitoestande lei normaalweg tot die produksie van hoë konsentrasies suiker-fotosintate in die blare.
Tipies word hierdie suikers oornag gemetaboliseer en na ander dele soos die ontwikkelende wortels en stingels getranslokeer. Koel nagtem- perature of ander stresfaktore wat wortelontwikkeling beperk, kan ’n opeenhoping van suikers in die blare en daardeur pers verkleuring veroorsaak.
Rooipers verkleuring van mielieblare ontstaan deur die ophoping van antosianienpigmente. Dit gebeur wanneer suikers in die blare en stingels vinniger ophoop as wat die plant dit kan benut.
Kultivar-spesifieke reaksie
Die meeste mieliekultivars dra gene wat antosianienproduksie stimuleer, wat tot die pers verkleuring kan lei.
Kultivars wat verskeie koue-sensitiewe antosianiengene bevat, is meer geneig tot die pers verkleuring van blare wanneer grond- en lugtemperature laag is tydens die vroeë vegetatiewe stadiums. Kultivars wat veelvuldige gene bevat wat pers verkleuring veroorsaak, kan ook meer opvallend wees as ander kultivars wat onder dieselfde veldtoestande groei.
Namate geaffekteerde mielieplante se klein wortelstelsels in groter en vinnig groeiende nodale wortelstelsels ontwikkel, is plante beter in staat om suikers vanuit die blaarweefsel na die wortels te herverdeel en begin mielieplante weer groen word. Geneties veroorsaakte pers verkleuring kom gewoonlik eenvormig voor by spesifieke kultivars, wat dit maklik van ander oorsake onderskei.
Invloed van wortelstremming en fosforbeskikbaarheid
Alhoewel sommige kultivars meer geneig is tot pers verkleuring, kan dit by enige kultivar voorkom as plante nie voldoende fosfor kan opneem nie. Pers verkleurings kan selfs voorkom wanneer grondfosforvlakke normaal is, maar wortelontwikkeling deur omgewings-, bestuurs- of plaagfaktore vertraag word.
Die toediening van bykomende fosfor aan pers mielies wanneer grondontledings voldoende waardes toon, sal waarskynlik nie tot ’n opbrengsverhoging lei nie.
Invloed van pers verkleuring op opbrengspotensiaal
Opbrengsverliese as gevolg van die pers verkleuring van blare hang grootliks af van die onderliggende oorsaak van die simptome.
- Tydelike stres, soos koel temperature of nat grondtoestande, kan wortelontwikkeling vertraag. Namate toestande verbeter, herstel die plante dikwels sonder ’n noemenswaardige opbrengsverlies.
- Aanhoudende stres, soos grondverdigting of onkruiddoderskade, kan langer in die groeiseisoen voortduur en moontlik ’n groter impak op die opbrengspotensiaal hê, afhangende van die oorspronklike oorsaak.
- ’n Fosfortekort kan beduidende opbrengsverliese veroorsaak en behoort in toekomstige voedingsbestuur ingesluit
te word. - Kultivars wat geneties meer geneig is tot pers verkleuring, herstel gewoonlik vinnig namate die temperatuur styg en nodale wortels ontwikkel, met min tot geen invloed op die opbrengspotensiaal nie.
Onderskeiding tussen genetiese pers verkleuring en fosfortekort
Produsente kan onderskei deur die volgende (sien Figuur 2):
- Kleurverspreiding
o Eenvormige pers verkleuring oor die hele land dui waarskynlik op ’n genetiese oorsaak.
o Onreëlmatige, kol-kol verkleuring dui moontlik op fosforbeperking.
- Groeistadium
Indien pers verkleuring ná die saailingstadium (meer as ses tot agt blare) voortduur, dui dit waarskynlik op ’n fosfortekort.
Oorsake van vertraagde wortelontwikkeling wat pers verkleuring van blare kan veroorsaak:
- Grond-pH se invloed op P-beskikbaarheid
- Koel grond- en lugtemperature
- Grondverdigting
- Planter-sywandverdigting
- Vlak plantdiepte
- Kunsmisbrand (te veel soute met plant)
- Nat versadigde gronde
- Saailingsiektes
- Insekbeskadiging van plantwortels
- Oormatige toediening van onkruiddoder
Bron: Syngenta VSA, 2024
Bron: Jeschke M, 2026
Samevatting
- Dit is noodsaaklik dat produsente die onderliggende oorsaak van pers verkleuring korrek identifiseer voordat bestuursbesluite geneem word.
- Deur grond- en plantontledings, asook veldwaarnemings doeltreffend te gebruik, kan onnodige insetkoste vermy word en voedings- en bestuurspraktyke doelgerig aangepas word.
- ’n Goeie begrip van pers verkleuring dra by tot beter besluitneming en die beskerming van die mielie-opbrengspotensiaal.
Bronnelys
Jeschke M, 2026. Purple corn syndrome. Pioneer® Seeds. Beskikbaar by:
https://www.pioneer.com/us/agronomy/purple-corn-syndrome.html [Toegang 6 Februarie 2026]
Madson A, 2025. Why do corn leaves and stalks turn purple under drought conditions, and can it be resolved? Crop Science US. Beskikbaar by: https://www.cropscience.bayer.us/articles/channel/why-do-corn-leaves-and-stalks-turn-purple-under-drought-conditions [Toegang 6 Februarie 2026]
Syngenta US, 2024. Causes of early-season purple corn. NK Seeds Blog. Beskikbaar by: https://www.syngenta-us.com/seeds/nk/blog/causes-of–early-season-purple-corn [Toegang 6 Februarie 2026]
