Vetverspreiding dié kampioen se sleutel tot die kroon

Damian Smith, voerkraalbestuurder van Bulskop Boerdery tussen Potchefstroom en Ventersdorp, is Donderdag as die enkel- en groepkampioen van dié skou aangewys nadat hy met punte van 95,96 (enkel) en 93,90 (groep) tydens die aan hak beoordeling kon spog.

Hy het in reaksie op sy oorwinning gesê dat hierdie titel goeie blootstelling is omdat hulle hul eie vleis bemark. “Dit dien as bewys dat ons die mark van goeie kwaliteit vleis voorsien en nie sommer net ‘n klomp diere bymekaar sit en hoop vir die beste nie,” het hy bygevoeg.

NWK Retail asook NWK Online was trotse hoofborge van dié skou wat sedert 2018 aangebied word. Dit is verlede jaar nie gehou nie weens die uitbreking van bek-en-klouseer.

Vet tel meer as spiere

Damian sê dat hy, met die oog op ‘n skou, diere selekteer met eienskappe wat hy weet beoordelaars soek. “Vetverspreiding tel meer as bespiering. Dit maak dit aansienlik moeiliker, aangesien dit maklik is om ‘n bespierde kalf raak te sien. Om vet onder die vel raak te sien, is nie so maklik nie,” verduidelik hy.

Sy raad aan ander produsente wat hul hand aan hierdie skoue wil wag, is om goeie kwaliteit kalwers maande voor ‘n kompetisie uit te soek. “Dit help nie jy begin met ‘n swak kalf nie. Gaan deur hulle almal en identifiseer die diere wat jy dink potensiaal het om goed te vaar in ‘n kompetisie.”

Hy raai produsente aan om maand ná maand deur hierdie diere te loop en diegene met meer potensiaal te identifiseer. Damian benadruk: “Moenie net na bespiering kyk nie, maar kyk hoe lyk sy vetneerlegging. Jy moet ‘n goeie balans vind.”

Dit is waar ‘n goeie rantsoen onontbeerlik is. “As jy ‘n swak rantsoen voer, gaan jy sukkel om die regte tipe karkas te lewer. Jy moet uit die staanspoor ‘n gebalanseerde rantsoen voer waarmee jy eers raam bou en dan vet aansit.”

Bulkskop Boerdery maak gebruik van voedingkundiges wat rantsoene spesifiek volgens hulle teikens formuleer. “Ons begin met ‘n rantsoen met ‘n hoë proteïeninhoud en skuif dan later ons fokus na een met meer energie. Ruvoer bly deurlopend hoog om die diere se rumengesondheid te verseker.”

Damian klas potensiële deelnemende diere deurlopend. Sowat twee weke voor die kompetisie selekteer hy streng deur die diere se bouvorm van voor tot agter na te gaan: Boude, blaaie, lendes en oogspiere. “Ek kyk na die sprong van die rib, hoe breed die dier is, sy lengte en natuurlik die vetverspreiding. Jy kies dan jou bestes en hopelik het jy jou wenkalf.”

‘n Goed georganiseerde skou

Albertus du Toit, ‘n beoordelaar van SAMIC, het die organiseerders geloof vir ‘n goed georganiseerde skou.

Hy het Damian se raad beaam deur deelnemers aan te raai om te werk aan hul vetverspreiding. “Die lende en voorkwarte van deelnemende diere het begin plat raak. Ons soek diere met ‘n hoër vetpersentasie,” het hy verduidelik.

Uitslae

Op hoef – enkelkampioen

1. SH Niemand & Seun (Peet Nieuwoudt)
2. SH Niemand & Seun (Peet Nieuwoudt)
3. SH Niemand & Seun (Peet Nieuwoudt)

Op hoef – groepkampioen

1. SH Niemand & Seun (Peet Nieuwoudt)
2. Bulskop Boerdery (Damian Smith)
3. Bulskop Boerdery (Damian Smith)

Op hoef – enkel super-os

1. PC Ondernemings (Petrus Boshoff)
2. PC Ondernemings (Petrus Boshoff)
3. Bulskop Boerdery (Damian Smith)

Op hoef – groep super-os

1. SH Niemand & Seuns (Peet Nieuwoudt)
2. Bulskop Boerdery (Damian Smith)
3. JT Voerkraal (Tony Teixeira)

Aan hak – enkelkampioen

1. Bulskop Boerdery (Damian Smith)
2. SH Niemand & Seun (Peet Nieuwoudt)
3. SH Niemand & Seun (Peet Niewoudt)

Aan hak – groepkampioen

1. Bulskop Boerdery (Damian Smith)
2. SH Niemand & Seun (Peet Nieuwoudt)
3. SH Niemand & Seun ( Peet Nieuwoudt)

Aan hak – enkel super-os

1. SH Niemand & Seun (Peet Nieuwoudt)
2. SH Niemand & Seun (Peet Nieuwoudt)
3. SH Niemand & Seun (Peet Nieuwoudt)