Die jaarlikse prysuitdeling vir almal wat bydra tot die sukses van Arena het die afgelope Maandag plaasgevind. Die doel van die jaarlikse kompetisie is om personeel aan te spoor om artikels vir Arena te skryf én om erkenning aan die outeurs te gee vir hulle bydraes. Sodoende word ‘n goeie standaard van artikels gehandhaaf om Arena ‘n spogtydskrif te hou.
Skrywers van die topartikels ontvang ‘n kontantbedrag as beloning vir hul skryfwerk. Prysgeld vir die geleentheid is deur Infoworks (uitgewers: NWK Arena), Bastion en NWK Korporatiewe Bemarking en Kommunikasie, geborg. Gedurende 2020 is 39 artikels gepubliseer, waarvan 28 vir dié kompetisie genomineer is.
In die individuele kategorie is die topskrywer vir 2020 Pieter le Roux vir sy artikel. Kriptospordiose: Voorkoming is beter as beheer – en goedkoper, wat in die Mei/Junie-uitgawe verskyn het.
Die ander pryswenners in die kategorie is:
2de: Martiens du Plessis en Michael van Rooyen (Optimale groei met volhoubare produksiestelsels, September/Oktober).
3de: Rudolph Schulenburg (Bewaringslandbou is meer as net minder bewerking, Julie/Augustus).
4de: Monique du Plessis (Pros and cons for using plastic, Julie/Augustus). Monique het ook die prys ontvang vir die beste nuwe toetreder.
5de: Eric Louw (Só kan jy heeljaar plante groei, Julie/Augustus). Hierdie reeks van Eric is ook aangewys as die beste reeks wat in 2020 in Arena gepubliseer is.
6de: Martiens du Plessis (Optimale biologiese produktiwiteit nodig vir volhoubare produksie, Julie/Augustus).
Anna-Marie van Rooyen, hoof- regsadviseur van Sekretariaat, is ook as ‘n nuwe toetreder beloon vir haar artikel, Pandemie belemmer uitvoer van kontrakte, wat in die Mei/Junie-uitgawe verskyn het.
Marina Vorster se voorbladfoto wat op die Januarie/Februarie-uitgawe gepryk het, het aan haar ‘n eerste plek gesorg.
Petra Seymore het met die tweede plek weggestap met haar foto wat op die Mei/Junie-uitgawe verskyn het.
