NWK se direkteur van ekonomiese ontwikkeling, Benedict Modise, asook die maatskappy se groepbestuurder van Korporatiewe Bemarking en Kommunikasie, Johan Bezuidenhout, het gister (11 Augustus 2021) 54 pare skoene by Bontle Primary School en 56 pare skoene by Motswaiso Primary in Bodibe naby Itsoseng oorhandig.

Daar is vandag 63 pare skoene by Lore Primary School en 61 pare by Motlhatswa Primary School, ook in Itsoseng, aan die dogters uitgedeel. Die pakkies het ook mussies, kouse, skoenpolitoer en borsels bevat.

NWK gee om

NWK onderneem die Skoolskoenprojek reeds sedert 2012/2013 en deel gewoonlik vroeg in die winter die skoene uit. Weens die sluiting van skole tydens vlak 4 van die inperking, was dit egter nie moontlik nie.

“Dit is vandag reeds die 503de dag van die nasionale staat van inperking weens die COVID-19-pandemie. Tog is dit gepas dat ons juis nou tydens Vrouemaand die skoene aan die dogters kan oorhandig,” het Johan gesê.

Weens die voortdurende sluiting van skole kon NWK verlede jaar glad nie die Skoolskoenprojek aanbied nie, maar het nietemin die fondse wat hiervoor geoormerk was, aangewend om beskermende toerusting vir skole, kleuterskole, produsente en hul werkers aan te skaf.

Die maatskappy het ook reënjasse aan leerders in Gerdau, toiletware aan Abraham Kriel Kinderhuis in Potchefstroom, beddegoed aan Thusanang Trauma Centre, mediese toerusting aan Mmalogaga-kliniek naby Zeerust en bederfpakkies vir gesondheidswerkers geskenk.

Benedict het gesê dat dit “deel is van NWK se DNS” om saam met gemeenskappe te werk. “Sowat 4 000 leerlinge het al danksy dié inisiatief skoolskoene ontvang en is hul menswaardigheid so herstel.

“Jy buig kinders wanneer hulle nog jonk is. Ons is reeds op primêre onderrigsvlak op hierdie wyse by hulle betrokke. Op sekondêre vlak, bekwaam ons hulle deur middel van die Ikateleng Projek, in samewerking met die Noordwes-Universiteit, waar hulle bykomende klasse in problematiese vakke soos Wiskunde en Fisiese Wetenskappe ontvang.”

Benedict het vervolg deur te sê dat kinders ‘n gemeenskap se verantwoordelikheid is en dat NWK hierdie verantwoordelikheid ernstig opneem. “Daar is verskeie loopbaangeleenthede vir hulle hier by NWK as hulle hul studies voltooi. Ons staan ook opkomende produsente by,” het hy hulle aangemoedig.

“As ons saam werk, kan ons soveel meer bereik en ons provinsie die ideale plek maak vir jongmense om hul te vestig, met ‘n ekonomie wat floreer. As die oudste landboumaatskappy in die land, bestaan NWK reeds langer as 112 jaar en deel ons graag ons sukses met die gemeenskap,” het Benedict afgesluit.

Daar sal eersdaags 259 pare skoolskoene aan die seuns by hierdie skole uitgedeel word. Die totale waarde van dié skenking beloop R133 337.