As voëlkyk jou stokperdjie is, stel jy dalk daarin belang om ’n uil of ’n aasvoël “aan te neem” en só te help met die wonderlike werk wat die twee bewaringsorganisasies hieronder doen. Besoek gerus hul Facebook-bladsye vir meer inligting.
Hulle red geveerdes en vierbeniges
Al het die Owl Rescue Centre – ’n nie-winsgewende organisasie wat tien jaar gelede in die Hartbeespoort-omgewing deur Brendan en Danelle Murray gevestig is – as ’n rehabilitasiesentrum vir alle uilsoorte begin, het die nood van diere só erg geraak dat hulle deesdae selfs honde en sebras red.
In Augustus is die Murrays uitgeroep na ’n bouperseel, waar ’n gevlekte arendsuil haar nes op ’n stutmuur gebou het wat die volgende dag afgebreek moes word. Die drie eiers wat in die nes was, is in die broeikas by Montecasino Bird Gardens geplaas, waar ’n sonar die aartjies, wat lewe beteken, ontbloot het.
VulPro maak ’n verskil
Op die foto bo pryk ’n witkopaasvoël (Trigonoceps occipitals) – ’n mediumgrootte aasvoël met ’n pienkerige vel, ’n donswit kop en ’n groot rooi snawel met ’n swart punt. Kerri Wolter van VulPro noem dat die bevolking van witkopaasvoëls in Wes-Afrika sedert die veertigerjare afgeneem het en dat dié spesie in Suider-Afrika meestal net in beskermde gebiede voorkom. Die redes vir die bevolkingsafname sluit onder andere die vergiftiging en doodmaak van aasvoëls vir tradisionele medisyne in.
STATISTIEK
- Sedert 1961 is meer as 15 000 aasvoëls al vergiftig.
- VulPro het sedert sy ontstaan al meer as 340 aasvoëls gevind wat deur kragdrade doodgemaak is.
- Meer as 900 aasvoëls is al deur VulPro gered en gerehabiliteer.
- Sowat 415 is reeds in die natuur vrygelaat.
Vir die koffietafel
Hierdie 72-blad koffietafelboek, Magnificent Vultures of Africa, word deur VulPro verkoop om fondse in te samel vir die wonderlike werk wat hulle doen. Die boek bestaan uit foto’s en inligting oor Afrika-aasvoëls. Die pragtige foto’s is deur van die beste fotograwe in hul veld geneem. Besoek www.vulpro.com vir meer inligting.
