Die bestuur van Rusoord Ouetehuis Vryburg en Brits Rusoord was oorstelp toe hulle sien dat elk van hierdie huise vir bejaardes R145 000 ontvang wat tydens 2022 se Grip4Charity-gholfdag ingesamel is.
Hierdie gholfdag word jaarliks aangebied en NWK se verskaffers neem grootliks hieraan deel. Inskrywingsfooie asook die opbrengste van ʼn wynveiling daardie aand word dan aan voorafgeïdentifiseerde begunstigdes geskenk.
Grip4Charity maak ‘n verskil
Die eerste Grip4Charity is in 2006 aangebied waarvan die eerste twee begunstigdes elk sowat R23 000 ontvang het. Hierdie inisiatief het sedertdien van krag tot krag gegaan tot waar R145 000 die afgelope Vrydag (24 Februarie 2023) aan 2022 se twee begunstigdes oorhandig is – die grootste bedrag tot dusver.
“Daar is deur die jare al R2,4 miljoen aan 31 begunstigdes geskenk. Die goeie verhouding wat ons met ons sakevennote het, maak dit moontlik om by hierdie som uit te kom,” het Johan Bezuidenhout, groepbestuurder van Korporatiewe Bemarking en Kommunikasie, tydens die oorhandiging van die tjeks gesê.
Truidie van Schalkwyk, bestuurder van Brits Rusoord, het Vrydag met die ontvangs van die tjek gesê dat, waar die tehuis voorheen tot 40 selfsorg-inwoners gehad het, daar nou slegs drie is.
“Hulle is nou almal verswak en pasiënte met Alzheimer se siekte.” Gemeenskappe se besteebare inkomste is minder en gesinne wag daarom nou tot die bejaardes in hul midde eers verswak is, voordat hulle hul in instellings soos Rusoord plaas.
“Dit vereis meer personeel om sorg te kan verskaf,” het Truidie verduidelik. Sy het NWK vir dié bydrae bedank en benadruk dat dit aangewend sal word om noodsaaklikhede aan te koop en instandhouding te doen.
Ook Gerhard Kühn, bestuurder van Rusoord Outehuis Vryburg, het gesê dat voedselinflasie van tot 17% hulle genoodsaak het om hul loesiestariewe te verhoog en dat hulle dit nie kan bekostig om personeel se salarisse opwaarts aan te pas nie.
“Een van die gevolge van dié losiesverhoging is dat ons vyf inwoners verloor het. Ons gemeenskappe raak ook uitgeput. Borge help eerstens skole en kan nie altyd vir ons ook help nie. Dit maak NWK se inisiatief net soveel wonderliker. Die gholfdag op Harbeespoort(dam) het ons blootstelling aan ander borge ook gegee,” het Gerhard verduidelik.
Die volgende Grip4Charity word beplan vir 17 Oktober vanjaar.
