Die honde en katte by Lichtenburg Dierewelsyn se sterte swaai vrolik nadat ’n bedrag van R65 000 en ’n allemintige 1,65 ton kos tydens die jaarlikse Toyota Night Race vir hulle ingesamel is. Dié resies is op 3 Maart by Lichtenburg Toyota aangebied en was ’n groot trekpleister vir fietsry-entoesiaste.
Al die fietsryers het om 19:00 weggespring en moes die speke laat sing tot 07:00 die volgende oggend. Omdat dit in die nag was, is ’n baan van 3,43 km uitgelê. Die doel was om te kyk watter deelnemer die meeste rondtes in hierdie tydgleuf kon voltooi.
Dusty Day, die bekende Suid-Afrikaanse fietsrykampioen, het 74 rondtes voltooi en is as die wenner aangewys. Die 15-jarige Wiejan Nieuwoudt van Lichtenburg was kort op sy hakke met 69 rondtes.
’n Hardloper, Riaan Ludick, het ook 50 km vanaf ongeveer 19:00 tot middernag kafgedraf. Vir die kleinspan is daar ’n spesiale fietsiebaan opgestel waarop hulle voor die tyd kon ry.
Dit is die derde jaar wat hierdie fondsinsamelingsinisiatief ten bate van Lichtenburg Dierewelsyn aangebied is. Marlette Smit, ’n verkoopskonsultant by Lichtenburg Toyota, is bekend vir haar welsynswerk in die omgewing en is die stigter van dié inisiatief. Sy is juis kort voor die Toyota Night Race weer as Toyota Suid-Afrika se Robin Hood Knight of the Year 2022 aangewys.
NWK was een van die hoofborge van die geleentheid en die buite-uitsending deur OFM is moontlik gemaak deur NWK en Lichtenburg Toyota. Die omroeper, Nico van der Westhuizen, het tydens die joyride ’n onderhoud met Johan Bezuidenhout, groepbestuurder van Korporatiewe Bemarking en Kommunikasie, gevoer oor NWK se betrokkenheid by die nagresies.
Johan het verduidelik dat, hoewel troeteldiere die mens se mees getroue vriende is, hulle dikwels afgeskeep word. “NWK skenk sedert 2015/2016 op ’n maandelikse basis kos en benodigdhede soos medisyne aan Lichtenburg Dierewelsyn.”
Oor NWK se talle korporatiewe maatskaplike verantwoordelikheidsprojekte, het Johan gesê: “Hoe meer dinge jy doen, hoe meer tyd kry jy om nóg te doen. Dit is vir NWK belangrik om terug te gee aan die gemeenskappe waarin ons funksioneer. Sonder gemeenskappe op die platteland het NWK nie ’n bestaansreg nie. Dit is en bly vir NWK ’n voorreg om te kan doen wat ons doen. Ons kan nie die wêreld red nie, maar ons kan vir mense hoop gee.”
Muriel Poole van Lichtenburg Dierewelsyn het gesê dat hulle oorweldig is deur die ondersteuning van maatskappye soos Toyota en NWK. “Ons is baie dankbaar vir die toegewyde werk deur die span van NWK om in die behoeftes van diere wat weggegooi en verwaarloos is, te voorsien.
Marlette is baie tevrede met die opkoms van hierdie jaar se byeenkoms. “Dankbaar is nie die woord nie! Elke jaar word net groter en groter. Daar is soveel mense wat met ons hande vat en ’n verskil maak. Ook NWK is ’n seën waarvoor ek net dankie kan sê!”
