Al is jy ‘n dapper muis, staan jy nie ‘n kat se kans teen dié gewillige jagters wat by Lichtenburg Dierewelsyn wag op ‘n nuwe huis nie. Dié organisasie doen weer ‘n beroep op produsente om katte aan te neem ten einde rotgetalle op hulle plase onder bedwang te bring en te hou.
Lichtenburg Dierewelsyn het tans te veel katte om in hulle hokke te huisves. Omdat wilde katte in elk geval nie goed aanpas in geslote ruimtes nie, probeer dié welsynsorganisasie om hulle sover moontlik op plase in die omgewing te vestig.
Die katte word vooraf gesteriliseer en produsente moet bloot gewillig wees om hulle van skuiling, kos en die nodige versorging te voorsien. “Ons het al baie suksesvolle plasings in die verlede gehad en wil produsente weer aanmoedig om van hierdie katte na hul plase te bring,” sê Nicole van Gessellen, ’n vrywilliger by die organisasie.
Cassie Buys, ’n produsent in die Gerdau-omgewing, het rondloperkatte wat by Lichtenburg se landboumuseum geskuil het op sy plaas gevestig. Hy sê bloot die teenwoordigheid van die katte by sy stoor hou rotte en selfs slange weg.
Carien en Philip van den Berg boer in die Ottosdal-omgewing en het ook katte ingeneem wat Lichtenburg Dierewelsyn op verskeie persele gevind het. “Hulle kry elke dag kos en melk en het intussen redelik mak geword. Ons rotprobleem is iets van die verlede. Ons kinders geniet dit ook om die katte op die kameras dop te hou,” vertel hulle.
As jy ’n kat wil inneem, kontak asseblief Lichtenburg Dierewelsyn by 071 313 9248 of 082 856 1451.
