Moderne boerdery verg gevorderde tegnologie om optimale opbrengste te behaal en hulpbronne doeltreffend te benut. Een van die belangrikste tegnologieë wat vandag in presisieboerdery gebruik word, is gewasmonitering met behulp van satellietbeelde.
Hierdie tegnologie bied waardevolle insigte in gewasgesondheid en voedingstatus, veral met betrekking tot water- en voedingstofbestuur.
Hoe werk dit?
Satellietbeelde verskaf gereelde en gedetailleerde visuele data oor gewasontwikkeling deur middel van multispektrale sensors. Hierdie sensors meet verskillende golflengtes van lig wat deur plante gereflekteer word, wat belangrike inligting oor die gewas se toestand verskaf.
Produsente kan met behulp van hierdie data probleme vinnig en akkuraat identifiseer en doelgerigte bestuursbesluite neem. Verskeie bestaande vegetasie-indekse, soos die NDVI (Normalised Difference Vegetation Index), LAI (Leaf Area Index), PAI (Photosynthetic Activity Index), SOI (Senescence Onset Indicator) en MSI (Moisture Stress Index) word bereken deur data van spesifieke golflengtes te kombineer.
NDVI vergelyk byvoorbeeld naby-infrarooistraling met sigbare rooi lig om gewasgroei en gesondheid te beoordeel. LAI meet ’n plant se totale blaaroppervlakte per eenheid grondoppervlak en word gebruik om die gewasdigtheid en fotosintese-doeltreffendheid te bepaal.
Dit help produsente om te verstaan hoe gewasse groei en of daar aanpassings in besproeiing of voeding nodig is. PAI dui op die hoeveelheid aktiewe chlorofil in plante en is ’n aanduiding van hul fotosintetiese kapasiteit, wat belangrik is vir stikstofbestuur en opbrengsoptimalisering.
SOI bereken die verhouding tussen chlorofil en karoteen, en is ’n aanduiding van vroeë afsterwing of rypwording. MSI gee ’n aanduiding van die plant se waterstatus. Deur hierdie indekse oor tyd te monitor, kan produsente tendense en spesifieke patrone in gewasontwikkeling identifiseer en betyds aanpassings maak om produksie te verbeter.
Die belangrikheid van stikstofbestuur
Stikstof is een van die belangrikste voedingstowwe vir plantgroei en speel ’n noodsaaklike rol in fotosintese en proteïensintese. Oormatige of onvoldoende stikstoftoediening kan egter opbrengsverliese veroorsaak en omgewingskade aanrig.
Die gebruik van satellietbeelde help produsente om stikstofvlakke doeltreffend te bestuur deur veranderinge in gewasgroei en gesondheid te monitor. Dit stel hulle in staat om presies die regte hoeveelheid stikstof op die regte plek en tyd toe te dien, wat tot verhoogde doeltreffendheid en kostebesparing lei.
Voordele
Deur intydse data te gebruik, kan produsente akkurate besluite oor bemesting en besproeiing neem. Dit lei tot kostebesparing deur presiese voedingstof- en watertoediening, wat vermorsing verminder en hulpbronne doeltreffend benut. Dit dra ook by tot opbrengsoptimalisering deur te verseker dat gewasse voldoende voeding kry, wat verbeterde groei en hoër opbrengste tot gevolg het.
Omnia Nutriology® bied ’n innoverende benadering tot gewasmonitering en voedingstofbestuur deur die gebruik van satellietbeelde. Hierdie oplossing stel produsente in staat om hul produksiepraktyke te optimaliseer en meer ingeligte besluite te neem.
Produsente kan hul gewasproduksie verbeter en volhoubare landboupraktyke toepas met behulp van kundige insette deur Omnia se landboukundiges. Die gebruik van hierdie tegnologie is ’n onontbeerlike stap in die rigting van presisieboerdery en ’n volhoubare toekoms vir die landboubedryf.
