“Let op na die vrae wat boere rondom ons het en skryf met hulle behoeftes in gedagte.” Dit is die “resep” wat Anche Suurd, landbou-ekonoom by NWK Finansiering, volg wanneer sy ‘n artikel vir NWK Arena aanpak. Sy is as die wenner van die enkel- en reeksartikels van dié tydskrif se artikelkompetisie gekroon.
Anche en ander tegniese outeurs is by ‘n funksie by NWK se hoofkantoor op 16 Maart vereer.
Daar is R18 300 in prysgeld aan outers van topartikels in 2025 se uitgawes oorhandig. Nicolene Smalman-Kotze (redakteur van die tydskrif), Martiens du Plessis (tegniese redakteur) en Johan Bezuidenhout (groepbestuurder van Korporatiewe Bemarking en Kommunikasie by NWK), het die kwalifiserende artikels beoordeel.
Kwalifiserende artikels word met die samestelling van elke uitgawe geïdentifiseer aan die hand van kriteria soos die relevansie tot landbou, aanbieding, oorspronklikheid, impak op lesers, asook navorsing wat ingespan is om die artikel saam te stel.
Agtien artikels is vir vanjaar se kompetisie beoordeel.
“Ek was baie verras en het dit glad nie verwag nie,” het Anche ná afloop van die funksie gesê. “Ek is wel baie dankbaar omdat dit baie tyd uit ons besige skedules vat. Dit maak daarom die wen die moeite werd!”
Haar raad aan ander outeurs is om moeite met hul in-diepte navorsing te doen en altyd te poog om iets op papier te sit wat vars en nuut is. “Dink buite die boks!”
Die geleentheid is geborg deur Infoworks, NWK Korporatiewe Bemarking en Kommunikasie, Bastion en Omnia.
Baie geluk
Outeurs is as volg vereer:
ENKELARTIKEL
- Anche Suurd – Klimaat se invloed op die plantdatum
- Rachel du Preez – Ruk die grondfondasie reg met bekalking
- Pieter le Roux – Mieliekuilvoer is ‘n waardevolle ruvoerbron
- Dawid van Heerden – Ureum se invloed op koeivrugbaarheid
- Rachel du Preez – Graangradering verseker billike handel
- Pieter le Roux – Oorweeg al die speenopsies vir optimale wins
- Anche Suurd – Bestuur jou kudde volgens die klimaat
REEKSARTIKELS
BESTE NUWE TOETREDER
- Zane Barnard – Die regte gronddiepte lei tot ‘n beter opbrengs (1)
- Klaston Sefiti – Good reasons to use black oats in crop rotation
BESTE BEDRYFSARTIKEL
Harm Bronkhorst – Kuberbedrog kan jou duur te staan kom
BESTE VOORBLADFOTO
Petra Seymore (foto van ‘n eekhorinkie op die Maart/April 2025-uitgawe)
Rachel du Preez
