Beheer winteronkruid en bewaar grondvog
Uitmuntende onkruidbeheer is nou van die uiterste belang om die laat herfs- en winterreën in die grond te bewaar. Baie vog gaan verlore deur winteronkruide. Begin deur winteronkruid betyds te beheer. Onthou dat oorgedraagde vog ’n groot bydrae lewer tot die nuwe seisoen se gewaspotensiaal, so benut dit met oorgawe. Oorhoofse bespuitings oor die ongestroopte gewasse is ’n goeie praktyk om winteronkruid te neutraliseer. In wye rye kan onkruid ook geskoffel word. Andersins moet dit direk ná strooptyd geskoffel word.
STIKSTOF, BEWERKINGSAKSIES EN CHEMIESE PRESISIE
Eric Louw, medebestuurder van Presisieboerdery by AgTech@NWK noem ook dat die afgelope seisoen swaar op stikstof geteer het, so produsente moet seker maak dat stikstof nie onderbemes word nie. “Grondsuurheid is nie goeie nuus in droër jare nie en moet by wyse van bekalking reggestel word, wat deeglik in die grond ingewerk moet word. Doen die regte bewerkingsaksies en doen dit doeltreffend, maar moenie grond onnodig aggressief versteur nie,” verduidelik hy.
Hy beveel verder aan dat ’n permanente spoorverkeerstelsel sterk oorweeg moet word. “Uitmuntende onkruidbeheer, twaalf maande van die jaar, is nou nóg belangriker as ooit tevore.”
Gegewe hierdie riskante scenario, is dit nou tyd om met chemiese presisie af te skop. Dit gee aan die produsent tyd om regstellings te doen en die verbeterings in te werk. AgTech@NWK Presisieboerdery is gereed om dit vinnig en doeltreffend vir produsente uit te voer. Dit is ook nou ’n goeie tyd om grondopnames (grondpotensiale) deur AgTech@NWK Presisieboerdery te laat uitvoer om gronde volgens hul potensiaal te bemes.
Normale reënval is ’n moontlikheid
Die weerprofete voorspel ’n neutrale stelsel vir die res van die winter, met die moontlikheid van ’n swak La Niña vir die komende seisoen. “Dit wil dus lyk of ons normale reënval vir Suid-Afrika gaan hê in die komende seisoen. Dit is egter nog baie vroeg om ’n akkurate voorspelling te maak en enigiets is nog moontlik,” sê Louw.
Weidingsadvies vir die wintermaande
Pieter le Roux, hoof-diere-en-weidingswetenskaplike by NWK, wys daarop dat die laat wintertydperk die aanvang van die normale tydperk van voertekorte inlei. Oesreste raak nou uitgeput en spaarkampe is meermale ook reeds benut. “Waar moontlik, moet oorblywende spaarkampe aangewend word. Vleie is ook gewoonlik vinnig om te hergroei en kan soms uitkoms bied.”
Hier is nog wenke vir winterweiding:
- Diere met hoër voedingsbehoeftes – soos verse of koeie wat laat gekalf het en nog soog – kan vroeër op staandehooi gaan en vroeër met kuilvoer gehelp word.
- Swaar besmette dekgraskampe kan in September meganies beheer word (oppas vir brande), maar die ideaal is ultrahoëdrukbeweiding om dit te wei en/of fyn te trap. Dit word doeltreffender deur tannien-binders (soos Browse Plus) met die diere se winterlekke of drinkwater te meng. Die hergroei van hierdie kampe moet dan weer vroeg in die groeiseisoen benut word, voordat dit onsmaaklik raak.
- Sorg dat die bemestingsbeplanning in plek is vir aangeplante weidings. Beplan vir twee toedienings om die risiko te versprei.
- Maak seker dat dragtige droë diere genoeg weiding het. Hulle moet teen dektyd op ’n kondisiepunt van 3 tot 3,5 uit 5 wees en ook in ’n positiewe energiebalans wees, met ander woorde in gewig toeneem.
- Winterweiding (oesreste ingesluit) is laag in ruproteïen. Hierdie tekort word met winterlekke reggestel. Die tekstuur van die beeste se mis is ’n goeie maatstaf. Hou vol met proteïenaanvulling totdat die mis begin “los” raak – ’n aanduiding dat daar genoeg proteïenryke groen materiaal in die weidings voorkom. Maak seker dat die korrekte lekbakbestuur in plek is.
Nuus uit AgTech NWK se hommeltuigruimte
VERBETERDE SEKURITEIT
DJI het onlangs ’n nuwe sekuriteitshommeltuig, die DJI Matrice 4T, bekendgestel. Dié hommeltuig het die volgende primêre sensors:
- Wye lens-kamera.
- Zoom-kamera wat optiese vergroting het vanaf 1x tot 15x met 4K-beeldgehalte, digitale vergroting 15x tot 112x.
- Termiese kamera wat hitteweerkaatsing optel, soos mense en diere.
- Infrarooikamera met ’n infrarooi lig wat vir nagsig gebruik word.
- Laser afstandmeter-sensor, wat afstande tot 2 km kan meet.
DJI spog met die Matrice 4T se kunsmatige intelligensie (KI)-sagteware, waar die hommeltuig mense en motors kan identifiseer. Dit kan ook ’n akkurate telling gee van die aantal mense wat die hommeltuig waarneem. Die ander nuwe KI-funksie is waar jy spesifieke teikens kan kies (soos motors of mense) om met die hommeltuig te agtervolg van ’n bepaalde afstand af.
Die DJI Matrice 4T se hoofdoel is om produsente se sekuriteit te versterk deur snags patrollie te vlieg. Jy kan dus verlore diere opspoor of diefstal verhoed. Verder kan die hommeltuig in die nag as ’n afskrikmiddel teen misdaad ingespan word, met die ligte wat flikker en brand. Beseerde diere kan deur dié hommeltuig opgespoor en gevolg word. Die gebruiker kan ’n presiese GPS-ligging ontvang om direk na die dier te ry, wat baie tyd en moontlik ook die dier se lewe kan spaar.
HOMMELTUIG SPAN OPTIESE VESELKABEL
’n Optiese veselkabel moes onlangs van die dak van NWK se hoofkantoor na dié van ’n gebou oorkant die pad in Buchananstraat in Lichtenburg gespan word. AgTech@NWK se DJI fly cart-hommeltuig het in ’n japtrap korte mette van dié taak gemaak, waarna NWK se IT-span die installering behartig het. Kliek op die skakel om die aksie te sien.
Vir meer inligting, kontak Okkie Vermeulen (landboutegnikus by AgTech@NWK).
Veeprodusente, neem kennis
- Teelbulle kan reeds in Augustus vir vrugbaarheid en geslagsiektes getoets word. Slegs gesonde bulle moet in die dekseisoen gebruik word. Teelramme kan ook in Augustus vir vrugbaarheid en geslagsiektes getoets word. Slegs gesonde ramme moet in die dekseisoen gebruik word.
- Indien skape nog nie teen bloutong geënt is nie, moet dit nou dringend gedoen word. Ent ook teen ensoötiese aborsie en Slenkdalkoors. Multimin en vitamien A kan ook nou reeds toegedien word.
- Lammers wat in Augustus gespeen word, word teen ensoötiese aborsie, bloutong, bloednier, Pasteurella en Slenkdalkoors geënt.
