Die donkie is ‘n wonderlike ding en dié pakdier het meer as 100 unieke vorms aangeneem by NWK se jaarlikse damesdag wat op 23 Augustus by Du Preez Prag buite Lichtenburg aangebied is.
Dit is die 19de damesdag wat NWK aangebied het om vroue te herdenk en word deur vrouepersoneel van NWK, asook lede van die NWVLU, bygewoon.
Petra Seymore, koördineerder van bemarking en skakeling wat die geleentheid reël, ontsien geen moeite nie om seker te maak dat vroue elke jaar ʼn vars en nuwe ervaring het.
Hierdie jaar is hulle op ‘n prettige wyse uit hul gemaksone geneem met Lillanie Schutte van Hartzgemaak Pottery wat hulle kom wys het hoe om donkies uit klei te maak.
Sy bedryf ʼn pottebakkery in Krugersdorp en reis die land vol om haar werkswinkels aan te bied waar sy vroue help om hul kreatiewe kant te ontdek en te omarm deur die donkies en ook koeie, bakkie, huisies, ligtorings en tuindwergies te maak.
Elkeen het 4 kg klei en gereedskap gekry waarmee hulle die donkies moes maak. Die proses begin deur die lyfie uit te rol en om ʼn leë garingtol te draai. Dan word vier balle gerol, met die duim uitgehol, met koerantpapier gevul en gevorm om uiteindelik twee boude, die kop en snoet te vorm.
ʼn Donkie is mos maar steeks en dis veral by die ore wat vroue moes spook om toe te sien dat dit die regte dikte is, sodat dit nie afbreek of te slap hang nie. Die kleimodelle kry elkeen oë, neusgate, maanhare en sommiges is selfs met kleiblomme versier.
Johan Bezuidenhout, groepbestuurder van bemarking en kommunikasie by NWK, kon nie die geleentheid bywoon nie, maar het die volgende groeteboodskap by monde van Petra gelewer: “Die rol wat vroue vandag in die moderne samelewing speel, durf nie onderskat word nie. Om ma en eggenoot te wees, gemeenskapsleier, trooster en beroepsvrou, verg murg in jou pype. Daarvoor eer ons julle vandag.
“Sonder die diensbare hande van die vrou is die mensdom arm aan sorg. Hulle vul nie net leë magies nie, hulle liefde maak mense se harte vol. Vroue is die gom wat ʼn samelewing bymekaar hou. Besef vandag dat jy ʼn dierbare vrou geskape is om met jou vrouwees in dié wêreld, lig te gee. Geniet jou vrouwees met vroulike oorgawe en passie.”
Die werkswinkel het sowat vyf ure geneem. Elke donkie was anders en so uniek soos hulle skeppers.
Lellanie en haar span het al die skeppings sorgvuldig en versigtig verpak en teruggeneem na hul studio in Krugersdorp waar dit gedroog en gebak is. Dit sou sowat agt weke neem voordat dit na NWK se hoofkantoor in Lichtenburg gekoerier sou word.
Hier is nog van die dag se aksie.
