Die Isuzu Ysterman 70.3 Mosselbaai is om die draai en NWK se Ysters vir Landbou is hard aan die oefen. Altesaam 70 deelnemers – tien solo-deelnemers en 20 aflosspanne – gaan NWK op 22 November in hierdie uitdaging verteenwoordig.
Volgens Jacques de Wet, bemarkingsbestuurder van NWK, is hierdie fondsinsamelingsinisiatief iets wat sport, gemeenskapsbetrokkenheid en landelike veiligheid bymekaarbring. Terwyl deelnemers aan die kompetisie deelneem, samel hulle terselfdertyd fondse in vir Agri Securitas, Agri SA se landelike veiligheidsfonds. Die fondse wat ingesamel word, word aangewend vir veiligheidsprojekte, infrastruktuur en traumaberading in landbougemeenskappe. “Die doel is om ‘n tasbare verskil te maak aan die veiligheid van mense wat op die platteland woon en werk,” sê Jacques.
Daar is drie dissiplines: 1,9 km swem, 90 km fietsry en 21,1 km hardloop. Die solo-deelnemers moet al drie dissiplines voltooi vir ‘n medalje. Die aflosspanne bestaan uit twee tot drie lede. Waar daar drie lede is, neem elke lid van die span aan een van die items deel. In die geval van twee deelnemers moet een van die twee deelnemers aan twee items deelneem. Deelnemers is deeglik bewus van hoe belangrik hul bydrae tot landelike veiligheid is, maar geniet beslis ook die uitdaging en spangees.
Só het dit ontstaan
Die Ysters vir Landbou-inisiatief is in 2025 deur Alf White (groephoof- finansiële beampte van NWK) geïnisieer omdat hy passievol oor produsente en hul veiligheid op plase is, maar dit nie self vir hulle kan bied nie. Hy het dus besluit om bewusmaking te doen ten bate van landbou en wou deur georganiseerde strukture soos Agri Securitas seker maak dat die regte ondersteuning, vaardighede en fondse tot produsente se voordeel ontsluit word.
Alf het reeds ‘n paar Ystermanne agter die rug en het sommige van sy kollegas by NWK aangespoor om ten bate van ‘n goeie doel fiks te raak.
Ondersteun en wen
Deelname is egter nie net vir sportlui nie. “Elkeen van individue tot ondernemings, boereverenigings en gemeenskapsorganisasies kan op hul eie manier tot die sukses van die veldtog bydra,” noem Jacques.
Die Ysters vir Landbou se inskrywings is reeds vol, maar enigiemand kan steeds deelneem en betrokke raak deur ‘n donasie te maak aan Ysters vir Landbou op die aanlyn fondsinsamelingsplatform, GivenGain, deur deelnemers te borg of direkte skenkings aan Agri Securitas te maak. Elke deelnemer is hier geregistreer, waar betalings gerieflik by elkeen se profiel gemaak kan word.
Deelnemers hanteer egter nie self die fondse nie – Agri Securitas is as begunstigde geregistreer en alle bydraes word direk aan hulle oorbetaal.
NWK het ook ‘n kompetisie bekendgestel waar ‘n LekkeSlaap-geskenkbewys op die spel is vir donasies van R250 of meer. Besoek gerus NWK Limited se Facebook-blad, die webtuiste www.nwk.co.za of kry meer besonderhede by die betaalpunte van NWK Retail-winkels.
DAGBOEK DIÉ DATUM
Wanneer: 9 Oktober
Wat: Taaiste Ysters vir Landbou-uitdaging
Waar: Hoërskool Lichtenburg se gimnasium
Tyd: 9:00 tot 13:00
Waarom: Om fondse in te samel vir die Ysters vir Landbou-inisiatief ten bate van Agri Securitas.
Wie kan deelneem?
‘n Span of spanne kan inskryf om mee te ding in fietsry-, hardloop- en roei-dissiplines. Plaaslike gemeenskappe, skole, ondernemings, boereverenigings, studiegroepe, NWK se verskaffers en georganiseerde landbou-instansies word uitgenooi om spanne in te skryf en hul staal te wys vir die titel, “Taaiste Ysters vir Landbou 2026”.
OFM het ook op dié dag ‘n buite-uitsending by die geleentheid. Daar sal baie te doen wees, waaronder interessante kompetisies met oulike pryse en genoeg om te eet en te drink.
Kry hier meer inligting
Hou NWK se Facebook-blad en webtuiste dop vir meer besonderhede.
Om in te skryf of op enige ander manier betrokke te raak, kontak Jacques de Wet by 018 633 1193 of 082 870 1442.
LEES MEER EN DRA SÓ BY
Kliek op die skakel om meer oor die deelnemers te lees en/of om ‘n bydrae te maak: https://www.givengain.com/event/ystersvirlandbou
Individue of maatskappye wat ‘n bydrae tot die inisiatief in sy geheel wil maak, kan bloot “Ysters vir Landbou” op GivenGain opsoek, en op die geel “Give”-blokkie kliek.
Elke deelnemer se profiel kan ook onder “Ysters vir Landbou” op www.givengain.com gevind word en betalings kan hier gemaak word.
