Nico het op 1 September in dié pos begin. Hoewel sy grootouers produsente was, was sy ouers deel van die “normale werkersklas” in Bloemfontein, waar hy grootgeword het. Hulle het later na Tweespruit verhuis, waar Nico na ’n landbouskool is. Dis hier waar hy ’n passie vir die bedryf ontwikkel het.
“Ek sou sê dis die dinamika van landbou wat my aangetrek het. Dis nie ’n statiese opset met ’n roetine nie. Daar is geweldige variasie en dit het my hart vinniger laat klop. Dit gaan oor ’n groter omgewing en nie net oor jou wat ‘papiere rondskuif’ nie. Dit gaan oor voedselsekerheid.”
Nico het hierna ’n meestersgraad in landbou aan die Universiteit van die Vrystaat behaal. Sy loopbaan het by Bayer se navorsings- en ontwikkelingsafdeling begin. “Die graanrade is toe ontbind, waarna ek ’n geleentheid gekry het om in VKB se graanafdeling te gaan werk.”
Hy wou egter meer ervaring in “groter gaan” opdoen. “Dit was maar hoofsaaklik geelmielies en ek wou meer ervaring opdoen in die witmieliemark. Ek is toe die geleentheid gegun om as hoof van graanbemarking by Suidwes Landbou te werk.”
Hier het Nico besef daar is nóg ’n groter komponent, wat die in- en uitvoer van graan behels. Hy is na Afgri, waar hy vir 16 jaar as direkteur van graanverhandeling gewerk het.
“Nou, by NWK, kan ek die hele pakkie bymekaarsit – die logistiek, graanverhandeling en silo’s, oftewel die hele waardeketting. My visie hier by NWK is om ’n kliëntebasis wat soos ’n familie is, op te bou. Ons is ’n klantgedrewe maatskappy. Ons moet streef na ’n volhoubare NWK, maar ook na ’n volhoubare produsent.”
Nico is met Nompie getroud en die egpaar geniet dit om te reis. Nompie woon nog in hul huis in Pretoria, maar sal eersdaags by Nico aansluit.
In sy vrye tyd geniet hy dit om te lees, handewerk te doen en na sport te kyk.
