Wenner van slaglamskou steun reeds vroeg op kruipvoeding

Die gehalte van inskrywings vir NWK Retail se Slaglamskou was “uitsonderlik” en die skou self is as die beste wat vanjaar nóg aangebied is, deur beoordelaars beskryf.

Inteendeel, die top 20 plekke het almal ‘n gemiddeld van 95% of hoër behaal en die top 64 plekke ‘n persentasie van 90% of hoër tydens die aan hak beoordeling. Wikus Bouwer van Rapoeli Witdorpers Stoet het met die louere weggestap en is as die algehele kampioen gekroon.

Dit was die tweede NWK Retail Slaglamskou, met ‘n totaal van 148 inskrywings.

Paul Maree van South African Meat Industry (SAMIC) het Dinsdag by Ottosdal Skougronde op die hoef beoordeel.

“Gewigte is goed en die vetverspreiding is goed. Van die lammers moes dalk langer in die krale gestaan het, maar die gemiddeld is baie goed,” was sy kommentaar.

Sy raad aan deelnemers was om die onderskeie rasse wat hulle inskryf, in gedagte te hou. “Rasse verskil. Vleismerino’s byvoorbeeld moet later bemark word. Die gewig mag dalk goed wees, maar nie noodwendig die vet nie.

Wikus was die enkelwenner op hoef, terwyl Boytjie Crispin as die groepwenner aangewys is.

Dirk Zandberg en Albertus du Toit van SAMIC het aan die hak geklassifiseer en beoordeel by Schweizer Reneke se abattoir. Wikus was die enkelwenner met ‘n persentasie van 99,68%, wat Albertus as fantasties beskryf het. Hy was ook die groepwenner met ‘n persentasie van 96,28%.

Wikus, wat reeds twaalf jaar lank aan slaglamskoue deelneem, het sy geheim gedeel: “Ek gee kruippille van dag een af. Ná twee weke gaan die ooie uit, die lammers bly agter en kry kruipvoeding. Hulle word op sowat twee en ‘n half maande gespeen en ontvang dan vol voeding.”

Hy het bygevoeg dat hy uit die staanspoor die gehalte van sy karkasse met beoordelaars bespreek het. “Hulle het my verduidelik waar ek tekort geskiet het en dan het ek ramme gekoop en gekies wat daardie foute sou uitskakel.”

Omdat dorpers geneig is om vinnig te vet te raak, is Wickus se doelwit om ‘n swaarder karkas met die regte vetverhouding aan die mark te lewer. “Ons deel van dié wêreld verkies ‘n swaarder karkas en op die ou end van die dag gaan dit oor rand en sent. Dus, hoe meer vleis, hoe meer wins.”