
Joy van Deventer, ‘n blommeboer van die Brits-omgewing in Noordwes, het in September geskiedenis gemaak toe sy aangewys is as Agri NW se eerste vroulike Jongboer van die Jaar. Sy verbou hoofsaaklik krisante in tonnels, wat aan sowel plaaslike as buitelandse markte gelewer word.
JOY is beskeie oor die toekenning as Agri NW se Jongboer van die Jaar. Sy het nie self ingeskryf nie, maar is genomineer. “Ek is nie iemand wat myself vooropstel nie,” vertel sy.
Haar man, André, het ‘n elektriese onderneming in Brits, maar is ook haar groot steunpilaar op die blommeplaas. Hulle het drie seuntjies, Luuk (8), Arjan (5) en Bram (3). Hoewel dit moeilik is, wend Joy ‘n doelgerigte poging aan om haar boerdery en gesinslewe te balanseer.
Só het die saadjie ontkiem
Joy is in Nederland gebore en haar ouers was albei by die blombedryf betrokke. Nadat sy aan Hoërskool Brits gematrikuleer het, is sy terug na haar geboorteland om meer oor die bloemistebedryf te leer. Sy het sowat vier jaar gelede met haar blomplaas, Berg-en-Dal, begin. Haar spesialiteit is krisante – in verskeie groottes, variëteite en kleure. Sy hou van dié blomsoort omdat dit veelsydig is en lank hou. Sy toets ook jaarliks nuwe variëteite.
Een van haar grootste uitdagings het gekom toe sy pas met die boerdery begin het en ‘n siekte in die grond geïdentifiseer is. Sy moes dadelik geld bymekaar skraap om ‘n duur steenkool-aangedrewe stomer te koop waarmee die grond gesteriliseer kon word. Joy meen haar boerdery is besonder intensief, omdat dit nie seisoenaal is nie en daar vyf keer per jaar geplant word.
Die meeste van Berg-en-Dal se krisante word aan Woolworths verskaf. Die res word aan die
Johannesburgse Blommemark en markte in Kaapstad en Durban gelewer. ‘n Klein persentasie word na Mauritius, Réunion en die Midde-Ooste uitgevoer.


Harde werk werp vrugte af
Joy meen haar aanwysing as Agri NW se Jongboer van die Jaar is ‘n groot pluimpie. “Ek voel geëerd dat ek raakgesien word. Dit is ook groot blootstelling vir die blombedryf.” Buiten vir ‘n kontantprys van R10 000, het sy ook die trotse eienaar geword van ‘n hommeltuig – ‘n DJI Agras T55-hommeltuig, geskenk deur AgTech@NWK – ‘n veeldoelige landbouhommeltuig vir spuit-, strooi-en ligtoepassings.
Sy is uiters opgewonde oor die handige geskenk wat sy as prys ontvang het en het aangedui dat sy dit heel eerste wil gebruik om skaduverf, ook bekend as kweekhuisverf, op haar tonnels te spuit. Die verf verminder hitte en help om plante teen sonbrand te beskerm. Sy besin nog oor wat om met haar kontantprys van R10 000 te doen.
Roneldi van der Westhuizen, bestuurder van hommeltuigdienste by AgTech@NWK, sê dit is ‘n groot voorreg om by die Jongboer van die Jaar-projek betrokke te wees. “NWK is meer as net ‘n korporatiewe maatskappy, en het altyd ten doel om boere te help waar moontlik,” het sy bygevoeg.
As wenner in Noordwes, is Joy outomaties ‘n finalis in Agri SA se Jongboer van die Jaar-kompetisie. Teen druktyd het die beoordeling reeds plaasgevind. Die nasionale wenner word op 26 November bekendgemaak.


Oor vroue en verenigings
Joy het sowat ‘n jaar gelede die boerevereniging, Agri Bokfontein, tot stand gebring en is ook die voorsitter. “Iemand moet begin sodat produsente kan saamstaan om die uitdagings in hierdie bedryf saam aan te pak.” Voordat sy Agri Bokfontein gestig het, was Joy ‘n virtuele lid van Agri NW.
Sy meen dit neem vroueprodusente langer as hul manlike eweknieë om hulself in die bedryf te laat geld. “Dit neem net soveel langer om almal wat jou pad kruis se respek te verdien – van werkers tot verskaffers. Maar wanneer jy daar is, verloop alles glad.”
Joy is ‘n NWK-klant en is baie dankbaar dat daar onlangs ‘n NWK Retail-winkel naby hulle plaas geopen het. Sy doen graag daar aankope.
Belangrike spesifikasies van die DJI Agras T55
Die DJI Agras T55-hommeltuig het ‘n spuittenk van 50 liter, met ‘n vloeitempo van 40 ℓ/min en standaard dubbele spuitkoppe.
Hierdie model het ‘n strooibak van 80 liter (55 kg strooikapasiteit) en ‘n strooitempo van tot 400 kg/min.
Die hommeltuig het ‘n ligvermoë van 40 kg, outomatiese balansering en noodkabel-vrystelling.
Dit het ook nuwe-generasie millimeter-golfradars, wat 250 000 punte per sekonde vasvang en onder meer help om kragkabels en ander obstruksies te vermy.
Verder beskik die DJI Agras T55 oor ‘n uitstekende Tri-Vision stelsel, 360° horisontaal en 180° vertikaal, vir voetgangers en voertuie tydens opstyging en landing.







