Bewaringsnuus uit ons kontrei

Pienk vir ‘n stewige poppie

Care for Wild is die grootste weesrenosterreservaat ter wêreld. Renosters word by die Care for Wild Rhino Sanctuary in die Barberton Natuurreservaat-kompleks gerehabiliteer en later in die natuur vrygelaat.

In Desember 2021 is “klein” Daisy, ’n kalfie wat ongeveer 12 uur oud was en minder as 60 kg geweeg het, deur Care for Wild gered. Sy kon nie staan nie en haar naelstring was nog steeds aan haar. Op 13 Oktober het Daisy egter ’n groot mylpaal in haar rehabilitasiereis bereik – sy het die 200 kg-mylpaal verbygesteek.

Om dié mylpaal te vier, het Daisy ’n reuse pienk jogabal gekry om mee te speel – en wie beter om mee saam te speel as haar goeie vriend, Modjadji.

’n Beter lewe wink

Die Owl Rescue Centre in die Hartbeespoort-omgewing is bekend vir hul reddingspogings van uile en ander diere. In September en Oktober was Brendan en Danelle Murray weer gereeld op die pad om hul reddingswerk voort te sit.

Op 14 Oktober is dié “fikse” jong dame uit ’n Virgin Active SA-gimnasium gered. Vir die Murrays is daar beslis trekke van die stigter van die Virgin Groep, sir Richard Branson.

Dié klein outjie is vroeg in Oktober binne-in ’n nuwe 2,1 miljard liter water-reservoir in Johannesburg gevang. WBHO Construction, wat die gebou voltooi het, het ’n weddenskap met Brendan aangegaan dat hy nie in die reddingspoging sou slaag nie. Nadat hulle verloor het, moes hulle ’n skenking aan die sentrum maak!

Elon, die bobbejaan, se storie het mense se harte aangegryp en is wyd op sosiale media gedeel. Nadat hy verskeie dele van Gauteng “geterroriseer” het, is Elon uiteindelik vasgetrek en ongedeerd na ’n meer natuurlike omgewing as die bedrywige stad geneem.

Nog ’n lid van die primaat-familie is ook gered. Die Murrays het ’n vier ure-vlug onderneem om klein Jesse te gaan haal. Hy is onwettig as ’n troeteldier aangehou in ’n nedersetting en deur die polisie gekonfiskeer, waarna die Murrays gekontak is.

Kyk vir my

By VulPro, die aasvoëlbewaringsorganisasie in die Hartbeespoort-omgewing, is Oktober die tyd vir oogondersoeke. Veeartsenykundige oogspesialiste van Johannesburg het van naderby na die aasvoëls kom kyk. Ongelukkig moes een van die Kaapse aasvoëlkuikens wat blind geword het, uitgesit word. Die ander se sig is in ’n uitstekende kondisie.

’n Witrugaasvoël wat in 2021 met ’n plastiekpyp om sy snawel in die Olifantsrivier Privaat Wildreservaat gevind is, is gerehabiliteer en vrygelaat. Danksy ’n nasporingstelsel is sy bewegings van Junie 2021 tot einde Augustus 2022 gemonitor. Klik op die QR-kode om sy roete te sien.