Die wenner van ‘n splinternuwe New Holland TT3.45-trekker in ‘n landswye kompetisie wat deur CNH Parts & Service van stapel gestuur is, is ‘n jarelange klant van NWK Meganisasie.
Pierre Vercueil (75) ‘n produsent van die Vryburg-omgewing, het die spoggerige prys op 27 Februarie tydens ‘n spoggeleentheid by NWK se hoofkantoor in Lichtenburg in ontvangs geneem.
Die Win a tractor-kompetisie het behels dat elke aankooptransaksie van egte onderdele van
R10 000 gedurende Oktober tot Desember 2024, outomaties vir ‘n gelukkige trekking ingeskryf is. Meer as 1 000 inskrywings is ontvang. Pierre is op 24 Januarie tydens ‘n regstreekse uitsending op Facebook as die wenner aangekondig.
Kan dit waar wees?
Toe hy van sy prys in kennis gestel is, het Pierre egter gedink iemand skeer met hom die gek. “Ek het gedog iemand trek my been! Gedink dis seker ‘Vrypostige Mikrofoon’ of iemand wat met my ‘n storietjie maak, want ek het nog nooit iets gewen nie,” het Pierre by die geleentheid by NWK vertel.
“Net omdat ek die onderdele op Vryburg koop om my masjinerie reg te hou, het ek nou ‘n deelnemer geword van ‘n kompetisie waarvan ek nie iets geweet het nie.”
Pierre het boonop aanvanklik gedink dis ‘n klein modeltrekkertjie soos ‘n “dinky toy” wat hy vir sy kleinseun sou kon gee. Dit was ‘n groot verrassing toe hy besef het dis die ware Jakob.
Die waarde van sy prys is sowat R240 000 en Pierre is van plan om sy jongste werktuig in te span om hooi en brandpaaie te maak.
Pierre is sedert 1972 ‘n klant van NWK Meganisasie. “New Holland is goeie masjinerie. Dit gaan egter oor die naverkopediens. Groter korporatiewe besighede het net meer kapasiteit. As iets sou fout gaan, gaan die maatskappy by jou staan.
“NWK probeer sy bes om ‘n behoorlike diens te lewer. Hulle versprei goeie produkte en staan al jare daarby. Hulle het ‘n goeie werkswinkel met vriendelike mense. As ek bel, is daar altyd iemand wat luister en hulle bes doen om te help. Van die verkoopspersoneel… Frans Kamffer verkoop al jare aan my. Hy het goeie meganiese kennis en was eers self ‘n werktuigkundige. Dit werk uitstekend vir my.”
David Visser, hoof van CNH-onderdele in Suid-Afrika, het in ‘n verklaring gesê dat die kompetisie oor meer as net die prys gegaan het. “Dit het daaroor gegaan om ons klante te help om voor te bly. Deur in egte onderdele te belê, het hulle die betroubaarheid en produktiwiteit van hul toerusting verseker, aftyd verminder en hulleself gerat vir ‘n uitstekende seisoen.”
