Die groep, wat uit 15 produsente bestaan het, het ‘n gemiddeld van 6,2 t/ha op mielies gerealiseer en 1,8 t/ha op sonneblom. “Dit is uitstekend as jy in gedagte hou dat hulle vanaf Delareyville en Mareetsane tot Koster dit op ‘n totale aangeplante oppervlak van meer as 3 800 ha vermag het,” het Jacobus Claassens, projekleier van die Beginnerprojek en agronoom by NWK Landboubestuursdienste, gesê.
Hulle sukses is tydens hul finansiële jaarafsluiting op 1 Oktober met ‘n geselligheid by NWK se opleidingsentrum gevier.
“Van die produsente het dié jaar beter gevaar as drie seisoene saam in die projek, wat beduidend is van die moeiliker tye waardeur hulle tydens die droogte was,” het Jacobus bygevoeg. Die inperking het wel die oesproses bemoeilik deurdat onderdele skaars geraak en ‘n tydelike dieseltekort die proses verleng het.
“Die invloed van die pandemie is egter grotendeels aan die einde van die seisoen ervaar en die meeste produsente het toe reeds hulle diesel aangekoop en daarom min voordeel getrek uit die laer brandstofprys. Dit sal wel ‘n invloed op die nuwe seisoen se kostes hê,” het hy bygevoeg.
Doel van die projek
Die Beginnerboerprojek is in 2014 van stapel gestuur. Dit strek oor ses jaar en het ten doel om nuwe toetreders tot landbou by te staan. Die einddoel is om ‘n produsent te vestig met genoeg sekuriteit om na ses jaar kommersieel te kan boer.
Die eerste sewe produsente wat hulle in 2014 by die projek aangesluit het, het dit nou voltooi en gaan nou op eie stoom kommersieel boer. “Dis tipies jong boere wat sonder NWK se hulp nie sou kon boer nie en heel waarskynlik Amerika toe sou gaan om daar te gaan werk. NWK ontwikkel dus sy toekomstige kliënte en vestig produsente met ‘n passie vir die bedryf. Ons fokus nie streng op resultate nie, maar sien eerder toe dat die bepaalde produsent alles in sy vermoë doen om NWK en sy eie risiko te beperk.”
Die droogtes in die begin van die projek het dinge wel bemoeilik. Die projek het die afgelope drie jaar egter ‘n 100% terugbetalingsrekord, wat toon dat die beginnerboere die vermoë het om te kan boer, met ‘n ses jaar gemiddelde terugbetaling van 97,2% wat slegs 2,8% uitstaande maak, hoofsaaklik weens die droogtes in 2014 en 2015.
Soms ly ‘n produsent ‘n verlies weens droogte, al beoefen hy/sy die beste praktyke in ‘n bepaalde gebied. NWK beheer nie die boer of sy praktyke nie, maar adviseer dit wat hy/sy wil doen sodat dit ‘n sukses is.
“Die grootste les wat elke produsent op ‘n jong ouderdom moet leer, is dat wat by sy buurman werk, nie noodwendig by hom gaan werk nie. Elke produsent moet sy sterkpunte ontdek wat van hom/haar ‘n sukses gaan maak,” het Jacobus verduidelik
HOE DIE PROJEK WERK
NWK finansier al die direkte insetkoste wat nodig is om ‘n deelnemer se oes te realiseer. ‘n Derde van die opbrengspotensiaal word begroot vir bemarking aan die begin van ‘n seisoen.
Die span van NWK loop ‘n pad saam met die beginnerboere. Hulpbronne word voor ‘n seisoen deeglik ondersoek en geëvalueer om NWK se risiko te beperk. Landboubestuursdienste besoek die deelnemers weekliks en gee raad oor wat gedoen moet word.
Boeredae word jaarliks aangebied wat dien as opleidingsessies. Kundiges van Finansiering en Graan lewer ook insette aan die deelnemers.
Henri Coetzee van Koster het die hoogste opbrengs mielies gerealiseer met sowat 8 t/ha en David Pitout, ook van Koster, het die grootste opbrengs sonneblom verkry – 2,56 t/ha. Chris le Roux is aangewys as die beginnerboer met die beste administrasie.