Ons moet ons seëninge tel! Die COVID-19-pandemie het ons al hoe meer bewus gemaak van dinge rondom ons, aangesien ons beweging meestal ingeperk was. Met die plaaslike verkiesings agter die rug en nog ‘n termyn vir die regerende party, is baie van ons met ongeloof, woede en moedeloosheid gevul.
Dit is in hierdie tye wat ons net moet terugsit en dink aan wat rondom ons aangaan. Die meeste van ons het darem water en elektrisiteit (al moet ons ‘n kragopwekker gebruik). Al val ons paaie uitmekaar, het ons voertuie om in te ry – en só kan ek aangaan. Oor die wêreld heen word mense deur armoede omring en het baie mense nie eens die basiese gebruik van water en elektrisiteit nie. Plaas jouself in só ‘n persoon se skoene – iemand wat niks het nie, het ook niks om te verloor nie. My boodskap gaan meer daaroor dat ons dankbaar moet wees vir elke seëning wat ons ontvang, al is dit hoe klein.
In die Feestyd wat voorlê, moet ons ook dankbaar wees vir ons Hemelse Vader wat sy Seun, Jesus Christus, verniet en sonder koste deur sy aardse geboorte op Kersdag vir ons gestuur het en dat Hy ook later aan die kruis vir ons sondes gesterf het. Laat ons dankbaar wees vir al die voorregte en familie wat ons in die Feestyd kan geniet.
Geseënde Christusfees vir ieder en elk!
Theo Rabe
Groephoof- uitvoerende beampte