Goeie bewerkingspraktyke, strategiese aankoop van insetmiddele en graanbemarking op die regte tyd is wat Attie Smook die titel van beste graanboer van die Delareyville Studiegroep se 2021/2022-produksiejaar besorg het.
Dit is die derde agtereenvolgende jaar wat Attie hierdie titel inpalm en vanjaar is hy ook as die studiegroep se algehele wenner aangewys. Vir hierdie oorhoofse titel, is nie net die totale hektare geproduseer en veevertakkings oorweeg nie, maar ook die boerdery se totale inkomste, uitgawes en balansstaatinligting.
Die studiegroep se afsluiting is op 19 November by Boschwild gehou en is deur NWK & IP Makelaars geborg.
Michael van Rooyen, bestuurder van Adviesdienste by NWK se Landboubestuursdienste en leier van die studiegroep, het verduidelik dat berekeninge soos skuldverhouding, winsmarge, likiditeit, solvabiliteit, netto boerdery inkomste asook bruto boerdery uitgawes – as persentasie van bruto boerdery inkomste – alles deel van die berekeninge vorm om te bepaal watter boerdery in geheel die beste gevaar het.
Attie het mielies, sonneblom en sojabone op 1 533 hektaar geplant en die hoogste bruto inkomste per hektaar, met die laagste produksiekoste per hektaar, behaal. Hy het dus die hoogste netto marge per hektaar gerealiseer.
“Attie se boerdery is dus finansieel baie gesond. Veral die bemarking van sy mielies is elke jaar in die kol, bloot omdat hy nie sy graan net ná stroop móét verkoop nie. Hy het dus tyd aan sy kant om die graan te kan bemark,” het Michael bygevoeg.
Schalk Viljoen is as die produsent met die beste veeboerdery aangewys. Tydens beoordeling kyk Michael na al die veevertakkings op elke plaas. Elkeen word bymekaar getel en die marge deur al die produserende diere op die plaas gedeel.
“Schalk het sowat 285 koeie in sy kudde. Hoewel hy nie die grootste beesboer is nie, is hy baie ernstig oor sy vleisbeeste. Die diere is goed versorg met ʼn speenpersentasie van 90% en Schalk behaal goeie pryse vir sy diere.”
Christo en Johan van Niekerk van VNB Boerdery het die beste administrasie deur die jaar getoon. “VNB is ʼn baie groot boerdery met geweldig baie vertakkings – mielies, sonneblom, sojaboon, koring, drie veevertakkings asook verskeie aangeplante weidings. Om alles reg te allokeer, raak ʼn uitdaging,” het Michael gesê.
Dit het jare gelede baie tyd in beslag geneem om al die inligting van VNB Boerdery in te lees en te verwerk. “Wat hierdie afgelope jaar uitgestaan het, is dat alles glad tydens my besoek verloop het. Alles was op datum, in plek en reg gewees.
“Die vraelys was volledig ingevul en korrek. Ek het na die tyd slegs een navraag gehad wat binne ʼn minuut uitgeklaar was. Dit was hierdie keer ʼn absolute plesier,” het Michael gesê. Hy meen dit is grootliks aan Ulricke Erasmus te danke. Die Van Niekerks het haar in 2016 aangestel om die boerdery se administrasie te behartig.
Hannes Steyn van Vlakpan Boerdery het die beste vordering deur die jaar getoon. Die wenners (eerste drie plekke) van die onderskeie afdelings kwalifiseer nie vir hierdie toekenning nie en sewe ander boerderye het hiervoor in aanmerking gekom.
Michael vergelyk 2021/2022 se netto boerdery inkomste per hektaar met dié van 2020/2021 om te bepaal watter boerdery per hektaar die beste vordering jaar op jaar getoon het. Hannes het hier die hoogste punte behaal.
