Die tehuise vir bejaardes wat vanjaar die begunstigdes is van NWK se Grip4Charity-gholfdag, is dankbaar vir dié inisiatief omdat hulle al so lank as twee jaar op finansiële hulp van die staat wag.
Die Japie Kritzinger-tehuis vir bejaardes op Bloemhof asook Silwerjare-tehuis vir bejaardes op Schweizer-Reneke is vanjaar se begunstigdes. Dit bring die aantal welsynsorganisasies wat NWK sedert Grip4Charity se ontstaan in 2006 gehelp het, op 35 te staan.
Dié jaarlikse gholfdag is die afgelope Donderdag by Pecanwood-gholflandgoed op Hartbeespoortdam aangebied en 36 spanne van vier het weer “vuisgeslaan” om aan dié gesogte geleentheid te kon deelneem.
Die geliefde aktrise, Lizz Meiring, was die seremoniemeester. Sy self is passievol oor welsynswerk en beywer haar veral vir die Teaterbystandsfonds, wat bejaarde kunstenaars ondersteun.
ʼn Wynveiling wat later die aand gehou is, vul Grip4Charity se opbrengste verder aan.
Theo Rabe, uittredende groephoof- uitvoerende beampte van NWK, het almal verwelkom en bedank by die prysuitdelingsfunksie. “Ons kan hierdie geleentheid nie aanbied sonder julle – ons verskaffers – nie. Julle is egter meer as sakevennote en is ons vriende,” het hy gesê.
“Bid vir ons”
“Almal in die welsynswêreld kry tans swaar,” het Elmarie van der Merwe, bestuurder van die Japie Kritzinger-tehuis, gesê.
Kyk na ʼn video van die Japie Kritzinger-tehuis vir bejaardes, hier.
“Dis reeds middel September en ons het nog glad nie van die staat gehoor of ons vanjaar ʼn subsidie gaan ontvang nie. Dit is uiters stresvol omdat ons nie weet wat vir ons voorlê nie,” het sy verduidelik.
Die tehuis kon in Augustus R250 000 met hul basaar insamel, maar Elmarie het benadruk dat dit maar “ʼn druppel in die emmer is”. “Dit hou skaars twee maande en dek slegs bedryfsuitgawes, nie salarisse nie.”
Die tehuis het 61 inwoners wat drie keer per dag gebalanseerde maaltye moet ontvang en met stygende kospryse, is dit ʼn uitdagende taak.
“Ons wil julle nie vra om julle hande diep in julle sakke te steek nie, maar eerstens om vir ons te bid. Gebed maak ons sterk en stel ons in staat om die uitdagings te kan hanteer. Gebede maak dat God in hooggeplaaste mense se harte en gesindhede werk.”
Inwoners word soos familie
Silwerjare het sy deure op 1 Januarie 1980 geopen en het 55 inwoners. Van hulle is in ʼn mate nog selfversorgend, terwyl ander 24 uur per dag van sorg afhanklik is.
Kyk na ʼn video van die Silwerjare-tehuis vir bejaardes, hier.
“Dis uitdagend vir die personeel, omdat hulle pasiënte soos familie word. Silwerjare reik ook uit na die gemeenskap waarbinne ons werk en het ʼn wondkliniek waar inwoners se wonde behandel word,” het ds Hardie Kotze, voorsitter van die ouetehuis, gesê.
Silwerjare gee ook elke Vrydag kospakkies aan behoeftige leerlinge van die plaaslike laerskool. Hardie het sy stem by dié van Elmarie gevoeg en sy kommer uitgespreek omdat diensvlakooreenkomste, waarvolgens welsynsorganisasies maatskaplike toelaes moet ontvang, nie onderteken word nie.
“Silwerjare ontvang reeds die afgelope twee jaar geen subsidie van die staat nie. Dit terwyl personeel salarisse moet ontvang en onderhoud gedoen moet word.
“Ons is daarom baie dankbaar vir hierdie geleentheid om ons fondse te kan aanvul.” Hy het NWK ook bedank vir die hulp om Silwerjare met ʼn sonkragstelsel toe te rus, sodat pasiënte wat 24 uur per dag van suurstof afhanklik is, nie tydens kragonderbrekings in lewensgevaar verkeer nie.
