NICOLENE Smalman-Kotzé, NWK se kommunikasiebestuurder, wat op 7 Januarie 2019 as multimediaspesialis by die maatskappy aangesluit het, groet Arena-lesers ná 7½ jaar.
As ‘n ernstige hardenuus-joernalis wat by die SABC in Mahikeng (voorheen Mafikeng) werksaam was, was die rustiger pas van dié pos aanvanklik ‘n groot aanpassing. Sy het egter vinnig ‘n nuwe ritme gevind in die meer gemoedelike omgewing en verskeie hoogtes bereik.
Een van dié hoogtepunte was die groei van NWK Limited se Facebook-blad. “Ek het ‘n baie doelgerigte strategie met NWK se sosialemediaplatforms gevolg en het veral baie moeite met Facebookgedoen. Die aantal volgelinge op dié blad het sedert my aanstelling in 2019 met bykans 16 000 volgelinge gegroei – iets waarop ek baie trots is.”
Met haar aanstelling as NWK Arena se redakteur in 2021 het dié tydskrif haar “baba” geword. “Ek is veral trots op elke profiel wat ek oor ons dinamiese boereklante geskryf het. Dit het daartoe gelei dat ek baie interessante, opregte mense ontmoet het.”
In haar redakteursbrief het sy lesers met alledaagse gebeure uit haar lewe probeer motiveer of inspireer. Lesers het vinnig agtergekom dat sy met haar hart op haar mou loop.
Op ‘n persoonlike vlak was Nicolene se deelname aan verlede jaar se Ysterman ten bate van Agri Securitas ‘n groot hoogtepunt, veral die kameraderie en spangees in die NWK-groep.
Die grootste lewensles wat sy in haar tyd by NWK geleer het, is dat ‘n mens nie kan kies wat met jou gebeur nie, maar wel kan kies hóé jy daarop reageer. Haar droom vir die toekoms is dat sy sal kan aanhou stories vertel en daarmee ‘n verskil kan maak, al is dit slegs in één persoon se lewe.
Nicolene het op 1 Julie by die groentesaadmaatskappy, Rijk Zwaan, in Pretoria ingeskakel as bemarkingspesialis: Kommunikasie nadat haar man, Richard, reeds in Februarie vanjaar ‘n gulde loopbaangeleentheid in dié stad aangegryp het.
