IKATELENG (Tswana vir “bemagtig jouself”) is ‘n program wat die Noordwes-Universiteit (NWU) reeds vir die afgelope amper 40 jaar met groot sukses aanbied. Die projek het in 1988 by die NWU se Vaaldriehoek-kampus afgeskop en is in 1991 na die Potchefstroom-kampus uitgebrei. Sedertdien het meer as 10 000 matrikulante die program voltooi. NWK belê voortdurend in die jeug en in die maatskappy se toekomstige werknemers en werk daarom sedert 2011/2012 saam met die NWU om dié projek aan te bied.
Die projek se hoofdoel is om matriekuitslae en toegang tot tersiêre instellings te verbeter. Dit word vermag deur aanvullende opvoedkundige onderrig vir graad 10- tot graad 12-leerlinge by agt verskillende sentrums in Noordwes, Gauteng, die Noord-Kaap en die Vrystaat aan te bied. Onderrig in lewensvaardighede en psigometriese toetsing is deel van die program.
In 2025 het altesaam 163 leerders ekstra klasse by die Lichtenburg-sentrum voltooi in vakke soos rekeningkunde, ekonomie, Engels, verbruikerswetenskappe fisiese wetenskappe, lewensweten-
skappe, sowelas wiskunde. Lichtenburg se resultate het stewige prestasie getoon, met 96% van kandidate wat ‘n slaagsyfer oor baccalaureus (81%), diploma (10%) en hoër sertifikaat (5%) behaal het. Die algehele slaagsyfer van leerders by die Lichtenburg-sentrum was 95%.
Die 2026-program het op Saterdag, 14 Maart, by die NWK Opleidingsentrum in Lichtenburg afgeskop met ‘n groep graad 10- tot graad 12-leerlinge. Vanjaar het NWK se Mensekapitaal-afdeling weereens aan die openingsgeleentheid deelgeneem, met die volgende sprekers:
- Dennis Coetzee, groephoof: Mensekapitaal, het oor loopbaankeuses gesels.
- Jo-Mari Horn, opleiding- en ontwikkelingspesialis, het op professionaliteit in die werkplek gefokus.
- Anita Labuschagne, talentwerwingspesialis, het die geleenthede wat NWK bied, bespreek.
