‘n Splinternuwe Aeversa-laaier waarmee elektriese en hibriede voertuie in ʼn japtrap gelaai kan word, is vandag by NWK Total Lichtenburg onthul.
Motoriste met elektriese voertuie kan dit nou met veiligheid hier herlaai terwyl hulle smul aan spesialiteitskoffies of heerlike etes by Vida e Caffè en/of BlackSteer.
Die laaier kan ‘n voertuig se battery in so vinnig as 30 minute tot 80% kapasiteit laai. Dit funksioneer met batterye wat met ʼn kombinasie van son- en munisipale krag gelaai word.
Twee voertuie kan tegelyk herlaai en afhangend van die laaivermoë van die voertuig, kan een voertuig met 120 kW laai of twee voertuie gelyk met 60kW elk.
“Hierdie laaier simboliseer vooruitgang en gee aan bestuurders die vryheid om vinniger, slimmer en met groter gerief te reis. Dit is nie net ‘n belegging in tegnologie nie, maar ook in ons gemeenskap en ons planeet.
“Ons hoop hierdie bekendstelling is een van vele mylpale op die reis na ‘n skoner en meer volhoubare toekoms vir ons land en ons gemeenskap,” het Bertus Jacobs, senior bestuurder van NWK Handel, gesê.
Die lint is deur Pieter Jansen van Vuuren (voorsitter van NWK se direksie) en Pieter Kleingeld (groephoof- uitvoerende beampte van NWK) geknip.
Motorhandelaars soos BYD, Volkswagen en Chery het ook die geleentheid bygewoon en elektriese en hibriede modelle daar uitgestel.
Herlaaikostes beloop R7.94 per kWh.
