UILE BESOEK WESIES
Die dak van die Owl Rescue Centre in die Hartbeespoort-omgewing se kliniek het ’n gat in as gevolg van stormskade. Brendan en Danelle Murray, eienaars en stigterslede van die sentrum, huisves gereeld wees-uiltjies in die kliniek waar hulle versorg word. Soms besoek wilde inwonende uile die babas wat roep.
‘N DONSIGE NUWELING
’n Splinternuwe donsige familielid van VulPro, die nie-winsgewende aasvoëlbewaringsorganisasie in die Hartbeespoort-omgewing. Kyk net na die oorgroot snawel, nuuskierige ogies en pootjies wat duidelik nog nie heeltemal uitgewerk het waarvoor hulle bedoel is nie.
NUUS UIT “DONKIELAND”
‘n Nuwe tuiste: Dit is nie altyd mishandelde donkies wat ’n veilige tuiste vind by Rest Ur Ass Donkey Sanctuary in Roodepoort nie. Meraai, Maggy en Tommy se eienaars het besef die omgewing waar hulle bly raak onveilig vir hulle en het die sentrum gevra om hulle in te neem.
Nederlandse engel bring besoek: Die Stichting Wings For Animals, ’n dierewelsynsorganisasie in Nederland, het ’n skenking van tetanus-, griep- en hondsdolheid-inentings geborg en persoonlik afgelewer by Rest Ur Ass Donkey Sanctuary. Dit beteken dat 300 “wonderlike dinge” beskerm is teen hierdie siektes.
VERKLEURMANNETJIE PAS FLINK AAN
Die Reptile and Wildlife Rescue (RAWR)-organisasie het dié klein Flapnekverkleurmannetjie gekry wat hul hulp nodig gehad het. Hy is ingeboek by sy luukse akkommodasie in ’n tydelike terrarium, toegerus met takke, klippe en baie blaarryke wegkruipplekke. Hy het kort daarna begin smul aan waterdruppels op die takke en ’n kriek verorber. Hy sal ná sy herstel weer in die natuur vrygelaat word.
