Ek is nie een vir Nuwejaarsvoornemens nie. Dit skep net ‘n teelaarde vir teleurstelling as ek teen Desember terugkyk en besef ek het min tot niks daarvan bereik nie. Ek het wel twéé vir 2022: Om eiendom te koop en te spaar.
Die bohaai rondom Shell wat seismiese toetse by die Wildekus wil doen, op soek na olie en gas, het my tot selfondersoek gedwing. Afgesien van die moontlike impak op walvisse en hul bewegings, stem ek saam met die oorhoofse argument van omgewingsbewustes dat ons eerder op meer volhoubare alternatiewe vir energie moet fokus.
Die skrif is aan die muur wat aardverwarming betref en elkeen sal sy deel móét doen om sy koolstofvoetspoor te verklein.
Koop jy bloot elke keer ‘n nuwe plastieksak wanneer jy inkopies doen, terwyl daar alreeds tien van hulle in ‘n laai in jou kombuis lê? Hoeveel keer gooi jy gemufte Cheddarkaas weg, bloot omdat jy te lui was om dit te rasper en te vries? Maak gerus ‘n pizza met daardie stukkies roerbraai wat van gisteraand se ete oorgebly het. Aan diegene wat hul neuse optrek vir oorskietkos wat in ‘n mikrogolfoond verhit word, wil ek net sê: Julle gaan eendag swaar trek in Pollsmoor-gevangenis!
Het jy al gesien hoeveel water ‘n emmer langs jou in die stort opvang? Teen die einde van die week het jy genoeg om al die beddings nat te maak én ‘n voertuig te was.
Hierdie een is gemik op my kollegas hier by NWK se hoofkantoor: Sit gerus die lig af wanneer jy jou kantoor tydens jou etensuur verlaat. Wanneer daar alreeds ‘n ketel in die kombuis prut, moenie ‘n tweede een aanskakel nie. Druk ‘n dokument aan weerskante van ‘n bladsy, in swart en wit. Bietjie-bietjie maak meer.
Die kosteknyptang wurg nie net produsente nie, maar elke verbruiker. Deur jou verbruikerspatrone aan te pas met die omgewing in gedagte, spaar jy noodwendig geld.
Jy hoef nie te wag vir ‘n nuwe jaar om ‘n nuwe blaadjie om te slaan nie, maar daar is nie ‘n beter tyd as 2022, met nóg stygings in brandstof- en elektrisiteitspryse op die horison, om briek aan te draai nie.
