Die sowat 1 600 atlete wat hierdie Saterdag vir die langverwagte Ottosdal Draf & Trap sal aantree, kan nou die spreekwoordelike voet in die hoek sit sonder dat hulle hul oor slaggate hoef te bekommer.
Produsente in die omgewing het verlede week fluks gate op die Boschpoort-pad – wat ‘n groot deel van die roete uitmaak – gevul met teer wat hulle self aangekoop het, asook 750 sakkies wat deur NWK geskenk is. Teen druktyd was daar slegs sowat 3 km se pad uitstaande waarvan gate nog gevul moes word.
‘n Boer maak ‘n plan en doen die werk
Linda Taljaard, een van die organiseerders van die Ottosdal Draf & Trap, het vertel dat hulle in die verlede, in samewerking met die padagentskap, die slaggate met gruis gevul het. Dit was egter nie ‘n volhoubare oplossing nie en sy het produsente in die omgewing gevra of hulle nie teer en arbeid beskikbaar sou stel om die gate te vul nie.
‘n Boer maak mos ‘n plan en volgens Linda was hulle almal baie bereidwillig om te help. Dirk Laas, een van dié boere, het vertel dat hulle in elk geval dikwels die pad onderweg na hul plase en die silokomplekse gebruik. “Die komende Draf & Trap is egter ‘n dringende aangeleentheid en ons het besef dat die regering nie vinnig sou kon help nie.”
Sowat 15 produsente en hul arbeiders het Donderdag skouer aan die wiel gesit en die gate gevul. Van die gate was só diep, dat dit eers met sement gevul is voordat dit hierdie week met ‘n laag teer geseël sal word. Die produsente self het 300 sakkies teer aangekoop en FNB het ook onderneem om nóg teer te skenk.
Uiteindelik weer tyd vir die “nagmerrie”
Ottosdal Draf & Trap kon nie in 2021 en 2022 tydens die wêreldwye COVID-19-pandemie en gevolglike inperking aangebied word nie. Die 42,2 km marathon, oftewel Ottosdal Nagmerrie, is egter ‘n gewilde Comrades en Two Oceans kwalifiseerder en daar heers groot opgewondenheid onder atlete wat hierdie jaar vir die 28ste Draf & Trap gaan aantree.
Fietsryers kan kies tussen ‘n 10 km, 20 km, 40 km en 84 km padwedren of ‘n 20 km, 40 km of 80 km bergfietsren. Die fietswedren is hierdie jaar vir die eerste keer ‘n Noordwes Padfietskampioenskap-wedren.
Die langasems sal hul veters vasmaak vir ‘n 10 km, 21,1 km of 42,2 km padwedloop. Daar is ook ‘n pretdraf van 5 km. Atlete is omring deur mielielande en sowat 1 600 handaangesteekte paraffienlampies verlig die roete.
Daar is reeds 800 voorafinskrywings ontvang en Linda verwag dat nóg sowat 800 atlete tydens die voorafgaande pasta-aand (Vrydag, 27 Januarie 2022) sal inskryf.
NWK borg ook ‘n verdere R15 000 vir die geleentheid. “Ons is baie dankbaar vir al die hulp en opgewonde om weer ‘n lekker saamtrek vir gesinne te kan bied,” het Linda gesê.
Vir meer inligting, besoek Ottosdal Draf & Trap op Facebook op www.ottosdaldrafentrap.co.za
